Tovolahy iray, tratry ny aretin'ny rà “anemie falciforme”, no maty, taorian'ny nitondràn'ireo olona nitondra azy ho any amin'ny hopitaly sy nitalahoan'izy ireo tamin'ilay dokotera tao amin'ny toerana fandraisana vonjiaina mba handraisana azy ao. Nolavin'ity farany izany talaho izany ary notsindriany fa hoe tsy dia misy sarotra sy itairana ny fivalànana sy fandoavana manjo ilay marary ka hoe handraisana azy ho ao amin'ny toeram-pitsaboana Salmaniya Medical Centre ka dia nangatahany ny hitondràna azy miverina mody. Saingy ilay olona nanaraka ny marary nahafantatra tsara ny zavamisy ka nitondra ilay tovolahy ho any amin'ny toerampitsaboana tsy miankina, izay avy hatrany dia niantso fiara mpitatitra marary hamindra azy maika ho any amin'ny efitrano famelomana aina tao amin'ny Sampana Mpamonjy Aina ao Salmaniya. Vantany vao tonga tao amin'ilay hopitaly, mbola namerina indray nanipika ilay dokotera fa tsy ilain'ilay marary akory ny handraisana azy ao amin'ilay efaitrano famelomana aina ary dia navoakany avy tao, dia niverina fotsiny taorian'ny tsy fahatsiarovantenan'ilay marary tena sy namoizany ny ainy.

Tsy tranga manokana io fa efa miverimberina ao amin'ilay firenena izay betsaka tokoa ireo olona tratry ny aretin'ny rà (anemie falciforme), ary heverina fa hoe manana fahaizana manokana amin'ireo fepetra rehetra ilaina amin'izany aretina izany sy ny vokadratriny ireo dokotera. Tsy voafetra fotsiny amin'ny resaka endrika ara-pitsaboana, fa idiran'ny fikarakaràna araka ny maha-olona ireo marary sy ny fianakaviany ihany koa ny fiatrehana ny aretina sy ireo marary. Volana vitsy lasa izay, nisy dokotera iray tao amin'ny fandraisana maika ny marary, niteny tamin'ny vadin'ny olona iray tratr'io aretin'ny rà io, izay nandresy lahatra azy mba handray ny vadiny ho ao amin'ilay hopitaly: “Tsy hotelin'ny dadanareo anie ity e !!!” Voatery nitondra ny vadiny nankany amin'ny hopitaly tsy miankina ilay ramatoa, izay namindra azy indray ho ao Salmaniya noho ny fiharatsian'ny fahasalamàny. Maty tao amin'ny toerana fikarakaràna manokana tao amin'ilay hopitaly ilay rangahy.

Rahoviana isika vao hitaky ny rariny ho an'ireny marary ireny? Mandra-pahoviana isika no hanampina ny sofintsika mba tsy ho helingelenin'ny kiakiak'izy ireny? Mandra-pahoviana ry zareo no hanohy hangataka ny zavatra efa zony rahateo? Mandra-pahoviana isika no hanoratra ho azy ireo ny  Panadol sy ny Ibuprofen mba hanamaivanana ny fanaintainan'izy ireny, izay tsy miafara akory amin'ny morphine aza?