[1]Lavarangana lehibe natao foibe vonjimaika ho an'ny mponina nafindra toerana noho ny ady mitam-piadiana ao Marawi. Sary avy amin’ Ina Alleco Roldan Silverio, mpiasa ao amin'ny Departemantan'ny Fiahiana Ara-tsosialy sy ny Fampandrosoana. Nahazoana alàlana .
Nahatonga ny fifindran'ny mponina an'arivony tao an-tanàndehiben'i Marawi, any amin'ny nosy atsimon'i Mindanao ny fanafihana nataon'ny miaramilan'ny governemanta Filipiana ny vondrona ao an-toerana ahiana ho manana fifandraisana amin'ny ISIS.
Tamin'ny 23 May, voalaza fa nanafika [2]sy nibodo tranobe isankarazany tao Marawi ny mpitolona ao amin'ny vondrona Maute. Noho ny filazana azy ireo ho manana fifandraisana amin”ny vondrona ISIS, dia nanambara [3]ny lalàna miaramila tao Mindanao ny filoha Filipina ary nandidy ny miaramila hisambotra ny mpikambana Maute sy hampitsahatra ny fihanaky ny ekstremisma.
Ahitana Miozolomana maro i Mindanao. Mitolona ho amin'ny fizakan-tena izay anton'ny dingana mankany amin'ny fandriampahalemana amin'izao fotoana izao ny vondrona ao an-toerana, kanefa nanameloka [4]ny fihetsiky ny mpitolona ao amin'ny Maute izy ireo.
Mikendry ny vondrona ao amin'ny Maute ny lalàna miaramila, kanefa nahatonga famindran-toerana faobe [5] ho an'ny mponina Marawi ho any amin'ny tanàndehibe manodidina izany. Nandositra ny tranony ny fianakaviana an'arivony mba tsy ho tratran'ny fifampitifirana [6].
Tamin'ny marainan'ny 30 May 2017, nilaza ny governemanta fa hiantraika [7] amin'ny fianakaviana miisa 14.313 na olona miisa 71.115 ny ady mitam-piadiana ao Marawi. Nilaza ny governemanta fa misokatra ny foibe fialofana miisa 20 ho an'ny fianakaviana miisa 2.261 na olona miisa 10.809. Olona an'arivony no nandeha nitady fialofana tany an-tanàndehibe hafa noho ny tsy fahampian'ny fotodrafitrasa. Hita nandeha an-tongotra nitondra ny enta-keliny ny olona sasany.
Herinandro taorian'ny fanambarana ny lalàna miaramila, nilaza ny governemanta fa efa eo ambany fanaraha-mason'izy ireo i Marawi. Kanefa toa mbola olana sarotra ny fanatsarana ny zavatra iainan'ny bakwit (ireo nafindra toerana) ho an'ny mpitarika ao an-toerana izay manombana ny fiantraikan'ny lalàna miaramila sy ny fanafihana ny vondrona Maute ankehitriny .
We were able to distribute family food packs to affected civilians in some hard-to-reach baranggays in Marawi City yesterday. pic.twitter.com/rLL28EfjTC [8]
— Sec. Judy Taguiwalo (@sec_judy) May 30, 2017 [9]
Afaka nizara sakafo ho an'ny fianakavian'ireo olon-tsotra voakasika izahay omaly tany amin'ireo faritra saro-dalàna tao an-tanàndehiben'ny Marawi .
Ireto ambany ireto ny sary izay mampiseho ireo mponina nandositra an'i Marawi, ny zava-misy tao anatin'ny foibe fialofana, ary ny zava-misy tao an-tanàndehibe fehezin'ny miaramila:
[10]Naparitaka tao an-tanàndehiben'i Marawi ny miaramila taorian'ny fanambarana ny lalàna miaramila . Sary: pejy Facebook-n'i Kathy Yamzon. Nahazoana alàlana.
[11]Tsy afaka namela ny biby fiompiny ny mpiompy sasany rehefa nandositra ny tanàndehiben'i Marawi. Sary: pejy Facebook-n'i Kathy Yamzon. Nahazoana alàlana.
[12]Rehefa nampiharina ny hamehana tao Marawi, olona an'arivony no namonjy izay fitaovam-pitaterana nisy mba handosirana ny tanàndehibe . Sary: pejy Facebook-n'i Kathy Yamzon. Nahazoana alàlana.
[13]“Toerana masina ” iray ao an-tanàndehiben'ny Saguiaran ho an'ny olona nafindra toerana tao Marawi , Lanao Del Sur. Sary nalain'i Jerome Succor Aba. Nahazoana alàlana.
[14]Karazana foibe fialofana ao amin'ny tranom-panjakana . Sary tao amin'ny pejy Facebook-n'i Ina Alleco Roldan Silverio, mpiasan'ny Departemantan'ny Fiahiana Ara-tsosialy sy ny Fampandrosoana . Nahazoana alàlana.