Akatòny

Fitia Tsy Mba Hetra Hampijoro Tsara Hatrany Ny Global Voices

Miasa mafy isan'andro ireo mpirotsaka an-tsitrapo manerantany ato amin'ny fikambananay hitondra ho anao ireo tantara tsy voatatitra manerana izao tontolo izao -- Saingy tsy afa-manao izany samirery tsy misy ny fanampianao izahay. Tohano amin'ny alalan'ny fanomezana (fitia tsy mba hetra) hoan'ny Global Voices ireo tonia, mpahay teknolojia, mpanentana ara-piarovana ato aminay!

Manomeza anio

Hijery ny Tenim-Pirenena rehetra? Mandika ny tantaran'ny Global Voices izahay mba ho hitan'ny rehetra ny fitantaran'olo-tsotra manerantany.

Nyetflix Sy Ny Dill: Nosoniavin'i Potinina ny Lalàna Mifehy ny Tolotra Fandefasana Sarimihetsika Vahiny An-tserasera Mivantana

Sary: @Nyet_flix, Twitter.

Nanasonia ho lalàna ny volavolan-dalàna izay mametra amin'ny fomba henjana ny fidiran'ny Tolotra Fandefasana Sarimihetsika Vahiny Mivantana An-tserasera amin'ny tsena Rosiana i Vladimir Potinina ny alatsinainy teo, izay fahatanterahan'ny fanentanana fanerena mafy lazain'ny manampahaizana iray ho notarihin'ireo mpanome tolotra ao an-toerana.

Ny lalàna, izay nankatoavin'ny Vaomiera Federaly sy ny “Duma”m-panjakana ao Rosia tamin'ny volana Aprily, dia natao hanohanana ny tolotra fandefasana sarimihetsika Rosiana mivantana amin'ny alàlan'ny fanakendana ireo mpamatsy vahiny toy ny Netflix, Apple TV, sy ny Google Play: mametraka ny lalàna fa ho an'ny Rosiana tsy manana zom-pirenena roa sosona ihany ny fisoratana anarana amin'ireo tolotra mandefa sary sy feo an-tserasera, ary mihoatra ny 20 isan-jaton'ny tolotra no azon'ireo vahiny ananana raha toa ka manana mpisera latsaky ny 50 isan-jato mipetraka ao Rosia izy ary eken'ny filankevitry ny governemanta.

Voafaritra ao anatin'ny tranonkala na fandaharana mahasarika mpisera mihoatra ny 100.000 isan'andro amin'ny ankapobeny ny tolotra mpandefa sary sy feo izay mizara votoaty misy raki-peo na lahatsary ary mampidi-bola amin'ny alàlan'ny dokambarotra mikendry ireo mpitsidika Rosiana na amin'ny alalan'ny maodelin'ny famandrihan-toerana. Ho soratana anarana ara-panjakana ireo tranonkala izay mifanaraka amin'izany famaritana izany ary ny Roskomnadzor, ilay mpandrindra ny aterineto Rosiana, no hanara-maso azy.

Nahazo fanerena avy amin'i Kremlin ny Netflix hatramin'ny nanombohany niasa tao Rosia tamin'ny volana Janoary 2016. Na dia mbola talohan'ny nidirany tao anatin'ny tsena aza, dia efa naneho ny ahiahiny ny mpiaro ny orinasa fa hanimba ny raharaham-barotry ny ao an-toerana toy ny ivi sy Okko ilay orinasa Amerikana amin'ny tolotra fandefasana horonantsary mivantana. Ho setrin'izany, nampiditra  lalàna ireo mpanao lalàna tamin'ny volana Martsa tamin'ny taon-dasa izay mikendry hamadihana 80 isanjaton'ny filman'ireo mpanome tolotra lahatsary avy any ivelany ho viadika amin'ny teny rosiana ary hamokatra, fara-fahakeliny, 30 isanjaton'ny votoatiny ao amin'ny tany Rosiana. Lasibatry ny lalàna manokana ihany koa ny Netflix izay mametra ny fandraisan'anjaran'ny vahiny ao amin'ny fampitam-baovao ho 20 isanjato.

Nidera ny lalàna vaovao ireo mpifaninana amin'ny Netflix ao an-toerana, izay nilaza fa tsy hisy fiantraikany ratsy amin'izy ireo izany. Nilaza i Mikhail Platov, tale jeneraly lefitra ao amin'ny ivi, fa “ekena” ny fepetra vaovao ary  “tsy hisy vokany eo amin'ny asan'ny orinasanay izany.” Ny Tale Jeneralin'ny Okko, Ivan Grodetsky, mandritra izany, nandeha lavidavitra kokoa, tamin'ny filazana fa  “faly ny orinasany satria tsy notsinotsinoavina ny hevitry ny vondrona hafa, “araka ny tatitr'i Gazeta.ru .

Sary nataon'i Kevin Rothrock.

Mihevitra ny volavolan-dalàna ho miverimberina ny indostiria ao an-toerana, satria manome dika mitovy amin'ny fitsipika maro izay efa ao anatin'ny boky izany ary anisan'izany ny volavolan-dalàna momba ny fitantanana fampahalalam-baovao vahiny. Manome dika mitovy ny ezaky Kremlin mikendry ny fanakanana votoaty “ekstremista” an-tserasera ihany koa ny lalàna, izay manery ireo mpanome tolotra lahatsary an-tserasera mba hisoroka ny votoatiny tsy ho ampiasaina “hanaovana heloka bevava”, anisan'izany ny “fizarana ny fitaovana izay ahitana antso ho an'ny vahoaka hanaovana asa fampihorohoroana ” sy “ny fanamarinana ampahibemaso ny fampihorohoroana.”  Handoavana lamandy 50.000 robla ka hatramin'ny iray tapitrisa robla ny fanaovana antso ho an'ny vahoaka hanao asa fampihorohoroana raha ho an'ny fikambanana ara-dalàna.

Ankoatra ny fiarovana ny orinasa mpandefa lahatsary mivantana ao an-toerana, nilaza  ireo manam-pahaizana sasany fa vokatry ny fanerena avy amin'ny vondrona hafa mahazo tombontsoa amin'ny Aterineto ireo fepetra voalazan'ny lalàna:  mitaky ireo tolotra mpandefa lahatsary mivantana mba handrefy ny zotra ao amin'ny [hanisa ny mpijery] Aterineto ny lalàna, raharaham-barotra izay ataon'ny orinasa LiveInternet ampihimamba, fananan'ilay alemana Klimenko, mpanolotsainan'i Potinina momba ny aterineto.

Nitsikera ny mpandinika ny orinasa fa ity volavolan-dalàna ity dia natao hanampiana ny mpikambana ao anatin'i Kremlin mba hanamafisana orina ny famehezany samirery ny fomba fanaraha-maso ny zotra amin'ny Aterineto. Araka ny loharanom-baovao avy amin'ilay mpikatroka mpanara-maso ny aterineto rublacklist.net, ny fampiasana ny kaontera (fanisana) LiveInternet no “dingana voalohany mankany amin'ny fanaovana ampihimamba ny tahirin-kevitra goavan'ny mpilalao izay hofantenan'ny solontenan'ny manampahefana, kanefa tsy mety mihitsy izany.”

Mandritra izany fotoana izany, nankasitrahan'ny manampahefan'ny fampahalalam-baovao-panjakana ny volavolan-dalàna, izay hanan-kery manomboka amin'ny 1 Jolay 2017, noho ny fanamafisana ny fiarovam-pirenena. Nanamarika i Ekaterina Larina, lehiben'ny sampan-draharahan'ny politikam-panjakana misahana ny haino aman-jery fa “Ampahany manan-danja amin'ny fiarovam-pirenena ny tontolon'ny torohay, izay manan-danja kokoa eo amin'ny fanatontoloana ny habaka aterineto sy ny herim-panintonany eo amin'ny mpanaraka. “

Atombohy ny resaka

Mpanoratra, azafady hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.