Nahazo Sazy 42 Taona An-tranomaizina Ilay Mpanao Lalana Koesiana Taloha Noho Ny Sioka Nalefany ‘Manevateva An'i Arabia Saodita’

Emir of Kuwait Sabah Al-Ahmad Al-Jaber Al-Sabah (center) with the Saudi King Salman bin Abdulaziz Al Saud (left) and the King of Bahrain Hamad bin Isa Al Khalifa. Photo by “Tribes of the World” via Flickr. (CC BY-SA 2.0)

Emiran'i Koety, Sabah Al-Ahmad Al-Jaber Al-Sabah (afovoany) miaraka amin'ny mpanjaka Saodiana Salman bin Abdulaziz Al Saud (ankavia) sy ny Mpanjakan'i Bahrain Hamad bin Isa Al Khalifa. Sary avy amin'ny “Tribes of the World (Fokon'izao Tontolo Izao)” tao amin'ny Flickr. (CC BY-SA 2.0)

Miatrika sazy 42 taona sy enim-bolana an-tranomaizina farafahakeliny ilay mpanao lalàna Koesiana teo aloha noho ny fiampangana isan-karazany ahitana fandefasana fanehoan-kevitra tao amin'ny Twitter izay heverin'ny manam-pahefana fa manivaiva ny firenena Arabia Saodita sy Bahrain mpifanolo-bodirindrina amin'izy ireo.

Tamin'ny 22 Desambra, nampangain'ny Fitsarana Ambony ho natevateva an'i Arabia Saodita tamin'ny fitsarana tsy natrehiny i Abdulhameed Dashti ary nahazo sazy folo taona an-tranomaizina, ka mahatonga ny fitambaran'ny saziny any am-ponja ho 42,5 taona. Noesorina tao amin'ny parlemanta mba ahafahan'ny manampahefana Koesiana manenjika azy i Dashti, izay mitsabo tena any UK amin'izao fotoana izao. Voampanga tamin'ny fiampangana teo aloha noho ny faniratsirana ny fivavahana, Emiran'i Koety (mpanapaka ny firenena) sy ny fitsarana ihany koa i Dashti.

Naneho hevitra momba ny sazy azony tao amin'ny Twitter i Dashti:

Mety mino ve ny olona salama saina fa voasazy 42 taona sy enim-bolana an-tranomaizina aho noho ny fanehoako ny hevitro fotsiny, inona ny demaokrasia resahanao ary fitsarana inona?!!!

Mpitsikera an'i Arabia Saodita i Dashti, indrindra ny adin'i Arabia Saodita amin'i Yemen sy ny firotsahan'ny miaramila an-tsehatra tamin'ny taona 2011 tao Bahrain mba hanasazy ny fitroaram-bahoaka. Malaza amin'ny fanohanany ny fitondrana mpanao didy jadona Syriana, Bashar al-Assad, sy ny fitondrana Iraniana ihany koa izy. Miatrika taona maro hafa any am-ponja izy noho ny tranga maromaro mifandray amin'ny fanehoan-kevitra nataony.

Tao amin'ny Twitter, raha niaiky fa tsy miombon-kevitra amin'ny fijerin'i Dashti izy ireo, naneho ny fanohanan'izy ireo an'i Dashti na izany aza ireo mpikatroka Koesiana maro. Nisioka i Sara al-Drees, mpikatroka nogadraina tamin'ny volana Septambra noho ny fanevatevana ny Emir ary noafahana vonjimaika amin'izao fotoana, mbola miandry fitsarana:

na dia eo aza ny tsy fiombonako hevitra amin'i Dashti, sy ny fanajana feno amin'ny fifandraisana amin'i Arabia Saodita, inona no dikany hoe managadra olona mandritra ny 42 taona noho ny teny!! 42 taona! ary ao Koety!

na miombo-kevitra amin'i Abdulhameed Dashti ianao na tsia, zonao izany….raha hanao tsinontsinona azy sy handroaka azy amin'ny politika, zonao ihany koa izany..saingy ny filazana fa manohana ny fahalalana miteny ianao kanefa faly amin'ny fanagadrana azy noho ny teny, dia mpandainga ianao izany

Tahaka ireo firenena hafa mpikambana ao amin'ny Vaomieram-Pifandraisan'ny Helodrano (GCC), firaisankina ara-politika sy ara-toekaren'ireo firenen'ny helodrano miisa enina, manameloka bevava ny tsikera atao amin'ny firenena hafa i Koety. Ary manasazy telo taona am-ponja farafahakeliny, heloka bevava, ho an'izay olona miditra an-tsehatra amin'ny “hetsika feno fankahalana firenena vahiny, amin'ny fomba mety hampidi-doza an'i Koety ka mety hisian'ny ady na fiharatsian'ny fifandraisana ara-diplaomatika” ny andininy faha-4 ao amin'ny lalàm-piarovam-panjakanaao amin'ny firenena.

Ao Bahrain, any am-ponja ankehitriny i Nabeel Rajan, mpikatroky ny zon'olombelona, noho ny fiampangana maromaro ahitana “fanevatevana firenena vahiny”, tamin'ny sioka mitsikera ny adin'i Arabia Saodita ao Yemen, izay azo saziana roa taona an-tranomaizina araka ny fehezan-dalàna famaizana ao amin'ny nosy-fanjakana. Ao Emirà Arabo Mitambatra kosa, miatrika folo taona an-tranomaizina ilay akademika sady mpahay toekarena Nasser Bin araka ny andininy faha-166 ao amin'ny fehezan-dalàna famaizana, noho izy nahavita “hetsika feno fankahalana” firenena vahiny, tamin'ny sioka mitsikera ny famonoan'ny mpitandro ny filaminana Ejipsiana ny mpanao fihetsiketsehana.

Tamin'ny volana Mey lasa teo, nanapa-kevitra ny fitsarana avon'ny lalàmpanorenena ao Koety fa ny fanehoana ny hevitry ny tena momba ny firenena vahiny dia tsy azo sokajiana toy ny “hetsika feno fankahalana”. Kanefa, toa mbola manohy mandefa olona any am-ponja noho ny fitsikerana firenena vahiny, indrindra ireo firenena mifanolo-bodirindrina ny mpitsara sy ny mpampanoa lalàna.

Atombohy ny resaka

Mpanoratra, azafady Hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.