Oh, Ireo Fehezanteny Ho Renao Eny An-dalamben'i Buenos Aires!
Dikanteny: “Tsy te ho andriambavy aho. Tsy afaka mihani-kazo ireo Andriambavy.” — Hoy ny zazavavikely eo amin'ny 5 taona tamin'ny vehivavy iray, Barrio Atlaya, Isidro Casanova. Asabotsy.
Sary: La Gente Anda Diciendo/Facebook
Niseho voalohany tao amin'ny PRI.org tamin'ny 24 Aogositra 2016 ity lahatsoratr'i Maria Murriel ity. Ary naverina navoaka eto ho anisan'ny fifanarahana fifampizarana votoaty.
Mipetraka eo amin'ny fisotroana kafe ianao eo amin'ny manodidina an'i Palermo ao Buenos Aires. Ary tsy afaka tena hihaino izay resahan'ireo olona roa eo akaikinao, kanefa afaka manavaka ny zavatra sasany ihany ianao. Mety ho zavatra toy izao, “Mihevitra ve ianao fa tsy manan-javatra atao tsara kokoa noho ny mitia anao aho.”
Eny, izany mihitsy no renao eny amin'ny metro. Fa raha tao amin'ny fisotroana kafe Palermo i Ezequiel Mandelbaum sy Tatiana Goldman indray andro, tokony ho dimy taona lasa izay, dia nihevitra izy ireo fa manitikitika ny saina tokoa ny zavatra heno toy izany, mivaona amin'ny zava-misy, ka nitsahatra ny resaka teo amin'ny roa tonta.
Nihaino fotsiny izy ireo.
“Tsy nahatakatra loatra ny zavatra noresahan'izy ireo izahay,” hoy i Mandelbaum. “Fa nanala voly ilay izy.”
Fanamarihana: saika tsy mety adika ny ankamaroan'ireo fehezanteny ireo tamin'ny fomba hahatakarana feno ny hatsarany. Fa toy izao ny dika mifanakaiky aminy.
“Inona no fitokisana tsy maintsy ataontsika Arzantiniana, raha mahafaly antsika daholo izay diky rehetra manidina.” — Hoy ny lehilahy iray eo amin'ny 25 taona tamin'ny iray hafa. Zoma.
Sary: La Gente Anda Diciendo/Facebook
Fa mihoatra noho ny fialana voly kosa ny nentin'izy ireo tamin'izay andro izay. Topimaso amin'ny “haiolombelona mahafinaritra” amin'ny toe-tsaina sy ny fomba fiainan'ny Arzantiniana – indrindra ao an-drenivohitra ny La Gente Anda Diciendo ( “Hoy Ny Filazan'ny Olona”). Nangonin'i Mandelbaum sy Goldman ireo fehezantenin'i Buenos Aires izay mamadika ireo hatsikana maneso, ny fomba mivantambantana sy ny fihetsika tsotra momba ny fitiavana sy ny fiainana ao an-toerana (eny fa na ireo bitika aza).
“Ao Buenos Aires, mora [ny mandre zavatra tsara tsy nahy ],” hoy i Mandelbaum. “Tsy fantatro raha izany tokoa satria miteny mafy be izahay, na tsy menamenatra izahay. Any anaty fiara fitateram-bahoaka izahay miresaka amin'ny dokoteran'ny fombam-behivavy amin'ny feo avo. … Mila fandinihana ny fomba fisainan'ny Arzantina , efa mahazatra ny mandre olona iray mandinika ny fiainan'ny olona miaraka aminy. “
“Hividiananao kilalao ve aho amin'izay aho tsy mamaky baolina intsony?” — Zazalahy kely, eo amin'ny 4 taona, niteny tamin'ny ray aman-dreniny. Zoma, 7 ora hariva.
Sary: La Gente Anda Diciendo/Facebook
“Yo, mahavidy nono amin'ny karatra fangalam-bola angaha ianao?” — hoy ny vehivavy 25 taona tamin'ny vehivavy iray hafa. Fiara fitateram-bahoaka. 2 ora hariva.
Sary: La Gente Anda Diciendo/Facebook
“Eritrereto toy izao ilay izy: ny zazakely dia tahaka ny alika ho ampianarinao miresaka aoriana kely ao, na any amin'ny farany.” — Hoy ny lehilahy iray 25 taona tamin'ny sipany. Gara. Asabotsy, 12:40 atoandro.
Sary: La Gente Anda Diciendo/Facebook
“Azafady ramose — tsy mbola bevohoka ianao ka noho izany tsy mila manome ny hevitrao.” — Hoy ny vehivavy iray 40 taona tamin'ny lehilahy iray 35 taona. Alarobia. 10:45 atoandro.
Sary: La Gente Anda Diciendo/Facebook
Ny hevitra voalohany dia ny handray an-tsoratra ireo fehezanteny re manerana an'i Buenos Aires, ary handrakitra azy ho boky. Nanapa-kevitra ny hamoaka azy ireo ao amin'ny Facebook i Mandelbaum sy Goldman rehefa afaka sivy volana nanangonana ireo fehezanteny. Nahazo mpanaraka an-jatony izy ireo indray lina, avy eo lasa an'arivony sy an'aliny maro.
Ny endrika tazonina dia ny haranitr'ireo fehezanteny, sy ny toe-javatra tiany hambara. Misy Asakanto amin'ny fifantenana ireo fehezanteny hanaovana ny tetikasa .
“Raha vao mahasambotra ny ampahan'ny fehezanteny ianao dia efa mamorona sahady tantara iray ao an-tsainao,” hoy i Mandelbaum. “[Nalainay ireo] fehezanteny mahaliana, ireo izay manaitra ny fakanao sary an-saina, izay mampihomehy.”
Ankehitriny ireo mpankafy no mandefa 100 isan-jaton'ny fehezanteny, mbola zava-dehibe kokoa ny singa manan-danja indrindra amin'ity asakanto ity: Mila henoina izy ireo ary soratana avy hatrany izany.
“Aza malahelo. Mitombo ao anaty alahelo ny hatsiaka.” — Hoy ny mpandalo iray tamin'ny vehivavy iray nitomany nikoso-maso. Zoma.
Sady: La Gente Anda Diciendo/Facebook
“Jereo , mila miara-miaina amin'olontiana ianao. Sarotra hatrany izany. Ny olona aminareo dia ny tsy fahasahianareo manandrana intsony.” — Hoy ny rangahy 60 taona tamin'ny lehilahy 20 taona. Plaza Constitución. Alakamisy.
Sary: La Gente Anda Diciendo/Facebook
“Mama, tsy ho tianao ity zavatra ho lazaiko ity kanefa tsy maintsy ho lazaiko anao. Nihinana mofo misy hena izahay tany an-tsekoly ary tsara noho ilay anao ilay izy. Mbola tiako foana anefa ianao na izany aza.” — Zazalahy kely 6 taona sady mandeha no mandefa hafatra amim-peo amin'ny findain'ny rainy izay mitantana azy. 4:30 hariva.
Sary: La Gente Anda Diciendo/Facebook
“Azo vinaniana [ ny miteny hoe iza no noforonina]”, hoy i Mandelbaum, izay tonian-dahatsoratra miasa ao amin'ny fifaneraserana. “Tsy maintsy mihaino izany ianao sady manoratra azy. Lasa manova ny fehezanteny any an-tsainao ianao rehefa miezaka ny hanoratra azy aty aoriana. “
Nahavita nitsidika an'i Amerika Atsimo ry zareo tamin'ny fanangonana fehezanteny, notohanan'ny Motorola. Ary efa namoaka boky roa ry zareo. Nanome aingam-panahy ny hafa tany amin'ny tanàna sy firenena hafa ry zareo.
Ary mbola be ny hoavy: nilaza i Mandelbaum fa manantena izy sy Goldman fa hisy ny mpanoratra hitondra lahatsoratra nakàna aingam-panahy avy amin'ny fehezanteny.
Tsy ho sarotra izany amin'ny fehezanteny toy izao, .
“Jereo fa azonao atao? Azonao atao eto amin'ity fiainana ity ny zava-drehetra.” — Hoy ny reny iray eo amin'ny 30 taona sady namafa ny lelon-janany 9 taona. Talata.
Sary: La Gente Anda Diciendo/Facebook
