Nahoana Ireo Vondrom-piarahamonina Teratany Ao Meksika No Mila Fiarovan-tena Ho An'ny Vondrom-piarahamonina

Protest in Ostula, Mexico

Hetsi-panoherana ao Ostula, Mexico. Nalaina tamin'ny kaonty Flickr an'i bradpose2, ambany fahazoandàlana Creative Commons.

Nampibaribary ny olana goavana eo amin'ny fanitsakitsahana ny zon'olombelona atao amin'ireo vondrona teratany ireo zava-niseho vao haingana tao Meksika. Niseho tao Santa María de Ostula, Michoacán state, ny tranga vao haingana indrindra tamin'izany, izay nitarainan'ny vondrom-piarahamonina teratany eo an-toerana ho notafihan'ny miaramila Meksikana.

Raha ny fahitàna azy dia nikendry ny hisambotra ireo lehiben'ny polisin'ny vondrom-piarahamonina sy ireo vondrona hafa fiarovan-tena miasa ao amin'ny faritra ny miaramila.

Tsy vitsy any Amerika Latina akory ny fisian'ireo polisin'ny vondrom-piarahamonina. Sampam-piarovana manana ny fandaminany manokana izay azy samirery, miaraka amin'ny fomba fitantànany manokana, miasa miankina amin'ireo filàn'ny vondrom-piarahamonina eo an-toerana ireny vondrona ireny.

Nipoitra mba handray an-tànana ireo olana eo an-toerana izay tsy voavahan'ireo polisim-panjakana napetraka any ny ankamaroan'ireo karazana hery fiarovana entina hanoloana ny efa misy ireo. Any Meksika, matetika ny polisim-piarahamonina misahana ireo olana mikasika ny vondrona mpanao heloka nomanina, izay tena mihetsiketsika tokoa any amin'ireo faritra maro manerana ny firenena.

Araka ny fitakiana natao tety anaty aterineto izay mitaky ny hanafahana an'i Semeí Verdía Cepeda, ny kaomandàn'ny polisin'ny vondrom-piarahamonina voasambotra taorian'ny zava-nitranga vao haingana tao Santa María de Ostula, fanjakana Michoacán:

Teo ambany fanafihana mateti-pihavin'ireo vondrona mpanao heloka bevava, indrindra fa ireo izay mifandray amin'ny fikirakiràna rongony, ny vondrom-piarahamonina teratany ao Santa María de Ostula, miaraka amin'ireo hafa maro ao amin'ny firenena. Noho ireo zava-mitranga ireo, ary noho ny tsy fahavitan'ireo fikambanana natao hiaro ny vahoaka sy ny firenena, ao amin'ny firenena, niara-nientana ireo mponina eo an-toerana mba hanangana polisim-piarahamonina.

Ankehitriny, tsy hoe miaritra ny setrasetran'ireo vondrona mpanao heloka bevava fotsiny ny vondrom-piarahamonina, fa ihany koa ny an'ny Polisy Federaly ary ny Tafik'i Meksika.

Tsy voalohany izao no nampangaina ho nanao fanararaotam-pahefana sy hery tafahoatra ny miaramilan'i Meksika, na koa hetsika voaheloky ny lalàna, indrindra hatramin'ny taona 2006 nanomezana andraikitra azy ireo hiantoka ny fiarovana ny vahoaka.

Miresaka izany indrindra ity lahatsoratra manaraka ity, avy amin'ilay Meksikana mpanao saritatra, Helio Flores, izay mivezivezy any amin'ny Twitter any:

“Fifamonoan'ny mpirahalahy” avy tamin'i @Helioflores_mex. Any #Ostula, Apatzingan, Tlatlaya ary toerana hafa maro + tsy voasazy. Via @SamuelMdzM

Antony iray, farahafaratsiny ampahany, amin'ny fanapahan-kevitry ny vahoaka ao Cherán, Michoacán mba hanomboka handrindra tena samirery tsy miankina amin'ny fanjakana, ary hiditra amin'ny fiarovan-tena, ny tsy fahampian'ny fahatokisana ny andrim-panjakana ao amin'ny fiarovana . Nahatonga aingam-panahy tamin'ireo vondrom-piarahamonina teratany hafa mba hanaraka ny dian'ny Cherán ihany koa ny antony mitovy amin'izany.

Ny vahoaka Zoque an'ny San Miguel Chimalapa, fanjakana Oaxaca, no iray amin'izany vondrom-piarahamonina izany, izay nampiasa ny bilaoginy amin'ny aterineto mba handàvana ireo manampahefana kaominaly sy ireo antoko politika misy eo amin'ny faritra, ary nanambara ny fananganana Kaomitin'ny Vondrom-piarahamonina izay manana tanjona ny hiaro ny faritra voazara ary ireo vokatra natoraly azo ampiasaina:

Naorina ny Kaomitinay vokatry ny fisintonana lakolosy sy fiahiahiana niainanay noho ny fomba nandravonan'ireo manampahefana eo an-toerana sy kaominaly ny olana teo amin'ny governemantan'i Oaxaca. Sahirana kokoa tamin'ny fizaràna ireo harena izy ireo, ireo fandaharan'asa sy ireo tetikasa eo amin'izy samy izy, ireo namany sy ny fianakaviany, fa tsy ny fibodoana, fangalarana ary fanimbàna ireo tanin'ny razambenay sy ireo vokatra natoraly azo ampiasaina, izay lasa lavitra tsy nisy mpijery akory.

Mandrisika anay hanontany ny maha-mitombina sy ara-dalàna ny rafitra ara-politika sy toekarena mibahan-toerana eto ny tolona hanànana fahaleovan-tena toy izany.

Misy ohatra maro mifandraika amin'io Mandatehezan'ny Vahoaka Teratany io, tafiditra amin'izany ny Otomí an'ny San Francisco Xochicuautla any amin'ny fanjakan'i Meksika, izay manohitra ny tetikasa fanamboarana làlana ho an'olon-tsotra manokana, izay hanimba ny ala sy ireo tany izay azy ireo; miady ny hiarovana ny tany masina amin'ireo tetikasa goavana be  fitrandrahana harena an-kibon'ny tany ny Huichol an'ny Wirikuta, ary ny Yaqui tribe an'ny Sonora, izay manompana ireo ezaka ataony amin'ny fanoherana ny fanamboarana ny lakandrano Independencia noho ny raho-mitatao apetrak'io amin'ny fambolena sy ny fiainan'ny vondrom-piarahamonina.

Ireo karazana fanehoana hery sy fanoherana ireo dia maneho ny filàna ny fanohizana ny fandraisana andraikitra hanoloana ny efa misy, izay manamafy ny fiaraha-miaina sy ny fandriampahalemana, ny fanajana ny fahalalahan'ireo vondrom-piarahamonina ireo mba ho afaka mandrindra ny ho aviny, ary ny fampiharana ireo zon'olombelona. Mba hisian'izany anefa, voalohany aloha, tsy maintsy mahafantatra tsara ireo adiny sy ireo fangatahany ara-drariny izy ireo.

Atombohy ny resaka

Mpanoratra, azafady Hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.