Sary avy amin'ny “You have one dollar, what's next?” (Manana iray dolara ianao, dia ahoana ny tohiny?) tao amin'ny Facebook.

Namely mafy ny vola “hryvnya” fampiasa ao an-toerana ny fahasahiranana ara-toekarena tao Okraina. Ny fitontonganana akaiky indrindra dia nitondra ny takalo ho 33 ny dolara amerikàna iray (tamin'ny Desambra 2014 dia 16 UAH ny 1 USD). Saingy niezaka ireo Okrainiana mavitrika mpampiasa media sosialy hitady ny lafiny tsara — tamin'ny alàlan'ny fitadiavana hevitra ifarimbonana mikasika izay azonao vidiana ao Kiev, renivohitra Okrainiana, amin'ny vola dolara iray monja.

Nitsapa hevitra ireo namany i Alena Denga ary nirotsaka nanao asa fitsongoana dia amin'ny anaran'ny tenany manokana mihitsy, izay niafara taminà lahatsoratra iray ao amin'ny bilaogy manome ny lisitr'ireo karazan-kevitra rehetra momba ny azo andaniana ny iray dolara-nao. Amin'izy ireny dia ireto no azonao vidiana ao Kiev:

• fihodinana im-7 amin'ny fiaran-dalamby ambanin'ny tany
• sakafo “Happy Meal” iray
• tsindrin-tsakafo iray any amin'ireny toerana fisotroana kafe ireny
• divay iray vera na labiera tapaky ny litatra
• kafe iray (iray raha any amin'ireo toerana metimety ary roa raha eny amin'ny kihon-dàlana)

Ho aloanao 22.5 UAH ny “cappuccino” iray sy “americano” iray eny amin'ny mpivarotra an-dalambe—latsaky ny iray dolara! Sary avy amin'i Medium.

Raha toa ianao mangetaheta hetsika ara-kolontsaina, dia mety hahafahanao mijery fampisehoana indray maraina ny iray dolara any amin'ireo trano fandefasana sarimihetsika na fitsidihana any amin'ny iray amin'ìireo tranom-bakoka maro ao Kiev. Safidy hafa handanianao ny 33 hryvnyas any aminao ireo boatinà labozia miendrika voankazo, ny karatra halefa ho an'ny namana rehefa any am-pitsangatsanganana (eny, amin'ny alàlan'ny paositra!), ary hatramin'ny tapakila fandehanana fiaran-dalamby avy ao Kiev mankany Vinnitsa.

Olona iray mampiasa ny Facebook aza nahavita mihitsy nividy tapakila hijerena “opera” tamin'ny 20 UAH  ($0.71).

Operàm-pirenena ao Okraina, Carmen, 27 Febroary 2015, 7 ora hariva.—20 UAH. Ary mbola ampy tsara hividianana “sandwich” iray.

Taorian'ny nahazoan'ny lahatsoratr'i Alena mpijery niisa 3500 tao anatin'ny alina iray monja dia nanangana vondrom-piarahamonina Facebook iray izy hanohizana ilay fifarimbonana, ahitàna ireo mpampiasa izay efa mandray anjara sahady manome hevitra momba izay azo ampiasàna ny iray dolara (na 33 hryvnyas) any amin'ireo tanàn-dehibe hafa ao Okraina.