Tetikasa takela-masoandro ao Sandwip, chittagong. Saripika nampindramin'i wikimedia.
Elektrisite, ilay zavatra mahatonga anao hahita izao lahatsoratra vakianao izao, moa mba fantatrao fa tsy mba tonga any amin'ny 45 isanjaton'ny mponina ao Bangladesh. Mbola vitsy noho ny atsasaky ny mponina ambanivohitra ao amin'ny firenena aza no mba manana herinjiro ao aminy. Izany no mahatonga ny Solar Home System Project [Tetikasa Masoandro isam-Baravarana], natomboka tamin'ny 2007, ho vaovao manokana ho tena tsara hoan'i Bangladesh. Fiaraha-miombon'antoka eo amin'ny Infrastructure Development Company Limited (tetikasa iray tohanan'ny Banky Mondialy) izay ny fitantanam-pitondrana no tompony sy ireo ONG 40 (tafidita amin'izany ny orinasa tsy miankina sy ireo sampandraharaham-pampindramam-bola) ny Tetikasa Masoandro isam-baravarana izao nahavita nitondra herinaratra sy fahazavana tamin'ny tokantrano 3 tapitrisa, izay mahatratra mponina mihoatra ny 20 tapitrisa.
Vao haingana teo i Bangladesh no nankalaza ny fahombiazan'ny fametrahana fitaovana 3 tapitrisa mitondra herin'ny masoandro isan-tokantrano. Taratry ny asa mafy vita izany fahatontosan-javatra izany. Naomi Ahmad nihora-pifaliana tamin'izany fety izany tamin'ny sioka iray tamin'ny fiandohan'ity volana ity:
#Bangladesh celebrated installation of 3 million #solar homes systems this month. Remembering all the killer work we put in for last year!
— Naomi Ahmad (@NaomiAhmad) November 11, 2014
Nankalaza ny fametrahana fitaovana mitondra herin'ny masoandro isan-tokantrano faha-3 tapitrisa i Bengladesh. Mahatsiaro ny asa rehetra nanasatra [mamono] vitanay tamin'ny herintaona!
Greenpeace namaly tamim-pifaliana ity tetikasa ity, mametraka ny tetikasa ho manampy amin'ny fametrahana ny revolisionin'ny angovo avy amin'ny masoandro:
Has the world been ignoring the largest #Solar revolution? It's in our subcontinent #Bangladesh http://t.co/tsRrE2fwnM #RenewableEnergy
— Greenpeace India (@greenpeaceindia) October 27, 2014
Tsy [te-]hahalala ny revolisionin'ny [angovon'ny] masoandro lehibe indrindra ve izao tontolo izao? Ao amparahatotsika ao mihitsy izany [Bengladesh] [Angovo azo havaozina]
Mametraka fitaovana mitondra ny angovon'ny masoandro ao an-tokantrano eo ho eo amin'ny 65000 isam-bolana ny Bangladeshis. Nanadihady ny antony mahatonga ny fitaovana mitondra ny angovon'ny masoandro ao an-tokantrano ho malaza i Zubair K M Sadeque, mpandalina manokana momba ny angovo. Notanisainy ny antony izay ahitana fiakaran'ny fidirambolan'ny any ambanivohitra, fampindramam-bola madinika matanjaka tohanan'ny ONG ao an-toerana, sy ny fivoarana nateraky ny fahazavana LED.
Manana otrikarena goavana manokana i Bangladesh raha eo amin'ny resaka angovo avy amin'ny masoandro. Hita amin'ny fangitra 30’200 sy 45’260 avaratra ao anaty toetany mafana ny firenena. Tsara dia tsara izany raha amin'ny fandraisana angovo avy amin'ny masoandro. Ny zavamisy aloha dia ampy tsara hoan'i Bangladesh ny angovo avy amin'ny masoandro 300 andro isan-taona.
Mahita ny lalany ao amin'ny fambolena ihany koa ny angovon'ny masoandro. Nankato ny fananganana paompy fampidiran-drano miisa 191 miainga amin'ny herin'ny masoandro ihany koa i Bangladesh (Efa tafapetraka sy miasa ny 69). manana ny anjara toerany lehibe eo amin'ny fandraharahana ambanivohitra ihany koa ny angovo avy amin'ny masoandro. Afa-manokatra ny fivarotany enta-madinika, fivarotana fanafody ary toera-pisotroana sy fialam-boly hatramin'ny alimbe koa ireo Tambanivohitra. Mampiakatra ny ora fiasana, fidirambola ary ny fari-piainana izany toe-javatra izany.
Tsy mora vidy ny fametrahana takelaka fandraisana ny taratry ny masoandro tao Bangladesh, saingy nandrisika ny fizoran'ny firenena ho ao amin'izany lalana izany ilay bilaogera Probir Bidhan :
#Solar is still too expensive in #Bangladesh but needed badly to be spread quickly! http://t.co/eeIKqA1CxD
— probirbidhan (@probirbidhan) November 4, 2014
Mbola lafo dia lafo ny Herin'ny Masoandro eto Bangladesh saingy nilaina mba haely haingana!
Amin'izao fotoana izao dia tsy manana asa ny 40 isanjaton'ny Bangladeshi. Mihamitombo isan-taona ny tahan'ny tsy fananan'asa, saingy mba nampahalefy izany ny fitaovana fampidirana ny herin'ny masoandro isan-tokantrano, izay namorona asa mihoatra ny 114.000 tamin'ny fanambatambarana, fivarotana, fametrahana, ary ny fikojakojana ny fitaovana mpitondra ny angovon'ny masoandro. Raha ny marina, efa saiky avy roa heny ny fitomboan'isan'ny asa mifandraika amin'ny herin'ny masoandro tanelanelan'ny taona 2011 sy 2013.
Mpanentana momba ny fikorontanan'ny toetrandro sy ny angovo i Mike Hudema. Nisioka momba ny asa mitsinjo ny tontolo iainana ao Bangladesh izy:
#GreenJobs Booming in #Bangladesh-80,000 home #solar units a month! http://t.co/PQXiMLojhb #cdnpoli #tarsands #abpoli pic.twitter.com/rMjMMljhKR
— Mike Hudema (@MikeHudema) June 21, 2014
Miroborobo ny asa mitsinjo ny tontolo iainana ao Bengladesh – fitaovana mampandeha amin'ny herin'ny masoandro 80 000 isam-bolana!
Nanomboka tamin'ny fomba ofisialy tamin'ny 1996 ny fivarotana fitaovana mitondra ny angovo avy amin'ny masoandro isan-tokantrano tao Bangladesh. Ny Grameen Shakti, sampan'asan'ny Grameen Bank, no nanomboka ny zotra. Tao anatin'ny 18 taona izay dia nahatsangana takela-masoandro mihoatra ny 1,3 tapitrisa ny Grameen Shakti.
