Akatòny

Fitia Tsy Mba Hetra Hampijoro Tsara Hatrany Ny Global Voices

Miasa mafy isan'andro ireo mpirotsaka an-tsitrapo manerantany ato amin'ny fikambananay hitondra ho anao ireo tantara tsy voatatitra manerana izao tontolo izao -- Saingy tsy afa-manao izany samirery tsy misy ny fanampianao izahay. Tohano amin'ny alalan'ny fanomezana (fitia tsy mba hetra) hoan'ny Global Voices ireo tonia, mpahay teknolojia, mpanentana ara-piarovana ato aminay!

Manomeza anio

Hijery ny Tenim-Pirenena rehetra? Mandika ny tantaran'ny Global Voices izahay mba ho hitan'ny rehetra ny fitantaran'olo-tsotra manerantany.

Tsy Ampy Ny Rano Any São Paulo, Nefa Tsy Mety Manao Fitsinjarana Rano Ny Mpitondra

The Cantareira System, which supplies 7 million people with water, has reached record lows yesterday with 4,1% of its total capacity. Image by Flickr user Fernando Stankuns.

Mandalo ny fotoan-tsarotra ratsy indrindra tato anatin'ny am-polo taona maro izao ho azy amin'ny resaka rano i São Paulo, fanjakana be mponina indrindra any Brezila. Ny fotoanan'ny lohataona, izay tena tsy ampy orana tao anatin'ny 84 taona, no nahatonga ny haintany izay mahakasika tanàna 70 hatramin'izao, ary miantraika amin'ny fiainan'ny olona 13.8 tapitrisa

Ny 38 amin'ireo tanàna ireo no nanomboka nanao drafitra fitsinjarana rano, ka ampifandimbiasina isan-kerinandro ny famatsiana ireo faritra manodidina. Na dia izany aza dia iray amin'ireo raharaha tena atahorana ny ao an-tanànan'i São Paulo, renivohitry ny fanjakana sady renivohitra lehibe indrindra any Amerika Latina. Amin'izao fotoana izao, dia  efa tonga amin'ny fetra farany ambany, 4,1 isanjaton'ny habetsahany zakany ny Rafitra Cantareira, tahirin-drano itambaranà farihy efatra, miandraikitra ny famatsiana rano ny 45 isanjaton'ny faritry ny  renivohitra  ( misy mponina manodidina ny 6.5 tapitrisa) sy ireo tanàn-dehibe hafa manodidina.

Na dia izany aza anefa dia efa am-bolana maro ny mpitondra fanjakana sy ny Sabesp, orinasam-panjakana mitantana ny Rafitra Cantareira, no tsy nanaiky ny mety hisian'ny fahampian'ny rano ao an-drenivohitra ary nandà ny fananganana ny drafi-pitsinjarana toy ny nataon'ireo tanàn-dehibe hafa. Nefa efa hatramin'ny fiandohan'ity taona ity ny mponina amin'ny faritra maro ao São Paulo no nitaraina amin'ny fahatapahan-drano isan-kerinandro na isan'andro. Vao tamin'ity herinandro ity dia  sekolim-panjakana 34 ao an-tanàna no nanana olana tamin'ny famatsian-drano - ary iray raha kely indrindra no nampiato ny fampianarany noho io antony io.

Ny olona sasany dia mino fa misy fitsinjarana rano an-kinafinafina mahazo azy ireo. Ao amin'ny tranonkala Faltou Água (Tsy misy rano) dia misy sarintany iombonana mampiseho ireo toerana izay lazain'ny mpampiasa fa misy fahatapahan'ny famatsian-drano. 

Ireto ambany ireto misy hafatra voafantina nozaraina tao amin'io tranonkala io tamin'ny Aogositra sy Septambra :

Corte de agua das 00:00 as 6:30 no jardim sao paulo zn de sp. Acontece a pelo menos 1 semana”

Fahatapahan-drano manomboka ny misasakalina hatramin'ny 6 ora maraina ao Jardim São Paulo, faritra avaratra. Efa ho herinandro izay fara-fahakeliny. 

Aqui na Vl Monumento falta água toda noite, começou faltando à partir das 0h depois foi aumentando o período, hoje dá 21h e já não tem mais água.

Tapaka isak'alina ny rano aty VI Monumento. Isaky ny sasakalina no fanombohany fa tapahany aloha kokoa izany isan'andro. Manomboka amin'ny 9 ora alina izao androany dia efa tsy misy intsony ny rano.

Na v Madalena cortam todas as noites. Isso faz quase 2 meses

Any Vila Madalena, efa ho roa volana izao no tapaka isak'alina ny rano.

Na dia izany aza, maro amin'ireo mponina ao São Paulo no tsy miaina akory izany olan'ny famatsian-dranony izany. Ho fanazavana izany dia manana hevitra mahaliana i Vinícius Duarte izay zarainy ao amin'ny Facebook:

Boa parte da população paulistana AINDA não sente a falta d'água (e acredita no governo, e continua gastando a rodo, e fazem piadinha com o tema) por uma razão simples: mora em prédio de apartamentos. Quando a Sabesp desliga o fornecimento (todo dia), o morador não vê a torneira seca e fica tranquilão. Afinal, ela continua a ser abastecida pela caixa d'água do edifício, que é coletiva. (…) Como algumas unidades consomem menos que outras, a coisa vai meio que se compensando. Mas isso só enquanto TEM água na caixa.

Maro amin'ireo mponin'i tanàn-dehibe ao São Paulo no MBOLA tsy mahatsapa akory ny tsy fahampian-drano ( ary mino ny mpitondra fanjakana, sy mbola mandany rano sy mivazivazy amin'io resaka io) noho ny antony tsotra : mipetraka aminà trano tsara izy. Rehefa tapahan'ny Sabesp ny famatsian-drano (isan'andro), dia mbola mandeha ihany ny rano amin'ny paompin-dry zareo ary dia mihevitra izy ireo fa mety tsara ny zava-drehetra. Nefa avy amin'ny tahirin-drano iombonan'ilay trano io rano io. Misy ireo trano sasany mampiasa rano kely noho ny an'ny hafa, dia mifameno ny fandanian-dry zareo mazava ho azy.  Nefa miankina amin'ny fisian'ny rano ao anaty sinibe iraisany no faharetan'izany.

Efa mila ho fongana ny Rafitra Cantareira

Nampahafantarin'ny Biraon'ny Fampanoavana ao amin'ny fanjakana fa efa fantatry ny Sabesp hatramin'ny 2012, fa mety hisy ny tsy fahampian'ny rano.  Tamin'izany fotoana izany dia nandefa tatitra tany amin'ny mpamatsy vola azy tany New York ilay orinasa – ny 25,4 amin'ny anjarany dia nifampiraharahana tamin'ny tsenam-bola tao New York – nampitandrina mialoha ny mety hisy haintany amin'ny Aprily 2014 ary mety hisy fiantraikany amin'ny fitantanam-bolany izany. Na izany aza anefa dia vao valo volana lasa izay no mba nanapakevitra ny handray fepetra ny Sabesp : ny fihenam-bidy ho an'ireo mpanjifa izay mitsitsy rano no paikady fototra hiadiana amin'ny faharitràn'ilay siniben-drano voalohany efa ho ritra.  

Hatramin'ny volana May, efa nampiasa ny andiany voalohany amin'ny ” hadiry maty” ( ny ambin-drano kely sisa ery amin'ny faribodin'ny farihy) ilay orinasa. Noraràn'ny mpanara-maso ny fakàna andiany faharoa amin'io hadiry io noho ny tahotra fa tsy hanjary ny fitantànana io famatsian-drano io, nefa nofoanana omaly 16 Okt izany fanapahan-kevitra izany noho ny hamehana satria tsy naharitra afa-tsy  herinandro vitsy monja ilay andiany voalohany.

Rano 106 lavitrisa litatra ilay andiany faharoa ary tokony haharitra hatramin'ny Martsa 2015 raha tsy misy fitsinjarana. Aorian'izay, dia tsy misy intsony : tsy misy ny hadiry maty andiany “fahatelo” ao amin'ny Cantareira. Ny hany sisa tavela dia ny fanantenana fa ny rotsakorana mandritra ny fotoam-pahavaratra, izay betsaka ny volana Desambra ka hatramin'ny Febroary, dia ho ampy hamatsiana rano misimisy kokoa mandritra ireo volana ambiny amin'ny taona 2015. 

Nametraka ity ho an'ireo mpanara-dia azy maherin'ny 1.600 ao amin'ny Facebook ny mpitoraka bilaogy Camilla Pavanelli :

O plano do governo do estado é um só: captar até a última gota de volume morto e torcer para que chova. Não há plano B. Sendo assim, eu diria que já passou a hora de reconhecermos o seguinte: O tempo de pensar no uso racional e consciente de água já passou. O assunto, agora, é outro. O assunto não é “usar com parcimônia para que não acabe”. O assunto é que está acabando – ou, se considerarmos que a água do Sistema Cantareira que estamos consumindo é volume morto, já acabou.

Izao ihany ny tetikasan'ny mpitondra fanjakana : mandritra ny tahirin-drano hatramin'izay teten-drano farany indrindra sy mivavaka mba ho avy ny orana. Tsy misy ny tetika B. Ka rehefa izany, heveriko fa fotoana izao hanekentsika ny zavatra rehetra : tapitra ny fotoana fieritreretana momba ny hampiasana amin'ny tokony ho izy sy amim-pahatsiarovan-tena ny rano. Lasa iny ny sambo. Tsy ny hoe :” mampiasa azy am-pahendrena mba tsy haharìtra azy” no fototry ny adihevitra amin'izao fotoana izao. Efa tapitra izany- na efa lany izany, raha heverintsika fa nanjifa ny ‘hadirin-drano maty’ isika. 

Inoan'ireo manam-pahaizana manokana fa efa-taona fara-fahakeliny vao afaka hiverina hiasa ara-dalàna indray ilay rafitra, nefa miankina amin'ny fahatratraran'ny rotsakorana ny haavo ara-tantara izany vinavina izany. Mitetika ny hitarika rano avy amin'ireo renirano hafa ilay rafitra fananganana fotodrafitrasa fototra ary ireo siniben-drano ao amin'ny firenena dia tsy ho vonona raha tsy amin'ny 2016, araka ny tetiandro nataon'ny Sabesp.

Ny any ambanivohitra

Misy tanàna ambanivohitra 38 izao no efa ofisialy fa hanaovana ny fitsinjarana rano. Tsy ny Sabesp no manara-maso ireo tanàna ireo fa manana ireo orinasa madinika ao an-toerana miandraikitra ny famatsiana ranon-dry zareo.

Ny tombontsoa amin'ny fitsinjarana rano ôfisialy dia fantatry ny olona ny fotoana sy ny ora hahatapahana'ny rano – ka dia afaka miomana izy ireo mba tsy ho tratry ny tampoka.

Tsy mahasakana ny fivoriana sy ny fanoherana izany. Na dia izany aza, dia efa niaina tamin'ny fitsinjarana rano sy ratsy famatsiana ny nanerana an'i Itu, tanàna misy mponina 163.000 hatramin'ny volana Febroary, distrika tsy maintsy mividy rano 3 tapitrisa litatra isan'andro any amin'ireo tanàna mpifanolo-bodirindrina. Nifamory faninefany hanohitra ny tsy fahampian-drano ny mponina tamin'ny Alahady teo, nisakan-dàlana sy nandoro fiarabe fitaterana.

Atombohy ny resaka

Mpanoratra, azafady hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.