“Nihomehy izy ka nihomehy nandritra ny fotoana niandrasany ny fitaterana mampitohy ny faritany samihafa. Tiraque, Cochabamba”.
Saripikan'i Mijhail Calle ho an'ny Olombelon'i Bolivia, nahazoana alalana.
Raha nahazo ny aingam-panahy avy amin'ny bilaogin'ilay mpaka sary Brandon Stanton mitondra ny anarana hoe Humans of New York (HONY) na Olombelon'i New York, ny mpaka sary matihanina sy mpankafy tsotra rehetra manerana ny tany tamin'ny fananganana bilaogy na pejy Facebook ahitana ireo sary sy tantara nangonina avy amin'reo olona avy amin'ny saranga rehetra –ary tsy maningana amin'izany i Amerika Latinina.
Nanome aingam-panahy ireo mpaka sary Amerikana Latinina izay te-hampiseho ny tanindrazany na ny tanànany amin'ny alalan'ny fampisehoana ny sarintavan'ireo olona isan-karazany misy ao aminy ny hevitr'i Stanton.
Ity ny jery indray mitopy maso ny tetikasa “Humans of…” (izay niniana nadika ho “Olombelon'i…” na tokony hijanona amin'ilay teny anglisy aza) ao amin'ny renim-paritra.
Olombelon'i Buenos Aires
“Tongava ary tsidiho aho amin'ny fotoana tianao hanaovana izany. Miala tsiny aminao aho tsy afa-mizara [zava-pisotro ao an-toerana] fa tsy manana toerana hamanàna rano aho.” Saripikan'i Jimena Mizrahi, nahazoana alalana.
Nampitodika ny manampahefana tao an-toerana ihany koa ny tetikasany, ka nahatonga ny fampirantiana voalohany ny Olombelon'i Buenos Aires. Nitatitra ny The Argentina Independent fa “ny fampirantiana ‘Micro historias del Microcentro’ dia nampisongadina ny endrik'ireo olona izay monina na miasa ao amin'ny distrikan'ny fandraharahana afovoany ao amin'ilay tanàna”.
Jimena niteny tamin'ny The Argentina Independent fa nanao ny Olombelon'i Buenos Aires izy “tsy noho ny fitiavana miara-mihosina amin'olona ihany, fa misy lesona ihany koa amin'izany fiaraha-mihosina izany. Tontolo ny isan'olona.”
“-Tsy mino aho! vehivavy mitondra fiarakaretsaka!
-Oadray, mieritreritra ve ianao fa tsy afaka ny ho mpitondra fiarakaretsaka ny vehivavy? Izao no fotoana tsy tokony ho gaga rehefa mahita vehivavy manao zavatra tsy mahazatra anao loatra noho hoe izy vehivavy, tsy zavatry ny lehilahy na vehivavy ireny.”
Saripikan'i Jimena Mizrahi, nahazoana alalana.
Olombelon'i Colombia sy Olombelona'i Bogotá
“Zazavavy Wayuu, zanakavavin'ny tompona efitrano fisakafoanana ao Uribia.”
Saripikan'i Gábor Szentpétery, nahazoana alalana.
Ny Humans of Colombia (Olombelon'i Colombia) dia natsangan'ilay mpahaibika Maurent Roa sy ilay mpanao maritrano Gábor Szentpétery. Nandritra ny dia nataon'izy roa no nifanenàny tamin'i Mauricio Romero, izay niditra tamin'ny tetikasa sy nandray anjara tamin'ny saripika sasantsasany. Nandritra ny dia nataon'izy ireo ihany koa no nanamarihan'izy ireo fa maro ny olona no tsy mahalala loatra momba an'i Colombia ka ratsy fomba fijery ny tanindrazana; amin'ity tetikasa ity ry zareo no mikendry ny hampiseho ny lafiny ilany momba an'i Colombia.
“Ny hevitra dia ny hampiseho an'i Colombia amin'ny alalan'ny olona ao aminy satria tsy mampino ny fahamaroan'ny karazan'olona eto Colombia. Misy fangaro Amerindiana, Espaniola ary Afrikana ao ka izany no tianay aseho amin'izao tontolo izao,” hoy ny fanazavan'i Maurent.
“Nihalehibe tao amin'ny saha fambolena kafe miala ora telo avy ao Bogotá i Carmen Lorena, saingy nieritreritra izy fa tsy natao ho azy ny fiainana ambonivohitra, aleony any ambanivohitra izay honenany ihany rehefa mahavita ny fianarany izy.”
saripikan'i Mauricio Romero, nahazoana alalana.
“Ahoana ny fomba fijerinao ny atao hoe fitiavana, ary ny fomba tianao indrindra hanehoana fitiavana?”
-“Mieritreritra aho fa mahadika ny zava-drehetra ny fitiavana, mahatonga ny zavatra rehetra manodidina antsika ary tiako hiteny hoe ny fomba tiako indrindra hanehoana fitiavana dia ny …miaina (misehosefo mifoka rivotra)”.
Saripikan'i John Cardona, nahazoana alalana.
Raha te-hijery sary hafa avy any Colombia, dia azonao tsidihana ihany koa ny Humans of Bogotá, (Olombelon'i Bogotá) pejy natsagan'i John Cardona sy Jonathan Arévalo tamin'ny jolay 2013.
Ny antony nanetsika an'i John sy i Jonathan dia ny valiny azon-dry zareo, ary kisendrasendra mifankahita amin'olona vaovao sy mandre ny tantaran'izy ireo azo aseho amin'izao tontolo izao ao amin'ny pejiny. Ny lazain-dry zareo fa ity hetsika ity dia “ny hampiseho hoe ahoana no ampitovizantsika rehetra amin'olona iray, na dia lavitra dia lavitra aza ny onenan-dry zareo.”
“Faniriana tokana?
-Filaminana ho an'i Bogotá iray vohitra.
-Fitoviana
-Fitoniana sy fandriampahalemana”
Saripikan'i John Cardona, nahazoana alalana.
Olombelon'i Bolivia
“Ao Sipe Sipe – Cochabamba, milaza ilay lehilahy hoe ‘ento any andafy ity’. Ary dia nilalao ny charango-ny izy.”
Saripikan'i Mijhail Calle, nahazoana alalana.
Natsangana tamin'ny 3 Novambra 2013 ny Humans of Bolivia (olombelon'i Bolivia) no iray amin'ny pejy Facebook vao haingana indrindra naka tahaka ny Olombelon'i New York ao amin'ny faritra. Estelí Puente sy Mijhail Calle te-hanangana ny tetikasa mitovy fihetseham-po amin'izay hitany tany New York psy mitovitovy amin'ny Humans of Amsterdam,(Olombelon'i’ Amsterdam) “fahatsapana fa ny mahaolombelona dia arafitry ny tsirairay samy manana ny tantarany.”
Na dia i Mijhail aza no naka ny ankamaroan'ny sary, dia nahatratra ireo mpaka sary hafa ry zareo izay afa-nizara sary avy amin'ny lafy valon'i Bolivia. “Ny hetsika dia mahatonga antsika hanagana sehatra ifampizarana sy iadian-kevitra momba ny anjara toeran'ny saripika amin'ny fananganana ny mahaizy antsika, noho izany dia mihoatra noho ny andian-tsarin'endrik'olona maro izy io. Tianay izy io ho antony hieritreretantsika ny momba antsika,” hoy ny fanazavan'i Estelí.
“Tsy maro loatra ny vehivavy amauta, mafy izany hoe anisany, saingy anisany aho. Ankehitriny aho anisan'ny firaisana aho”.
Saripikan'i Mijhail Calle, nahazoana alalana.
Olombelon'i Honduras
“Ny faniriako lehibe indrindra ho an'ny mpanao politika dia ny tsy hijery ny lokon'antoko politikany avy, sy izay ifantohany ka hijery ny fanatsarana sy ny fivondronan'ny fireneny. Izay ihany ny fomba tokana ahafahan'i Honduras mandroso.”
Saripikan'i Claudia, nahazoana alalana.
Claudia Elvir sy Daniela Mejía no manasa “anao hamantatra an'i Honduras amin'ny alalan'ny olony” tao amin'ny pejy Facebook-n'i Olombelon'i Honduras.
Nanaraka ny bilaogin'i Stanton i Claudia ary variana, “tsy tamin'ny sary mahatalanjona azy ihany, fa tamin'ny fomba fanapihana ny mahaolona tao ambadiky ny sarintava tsirairay ihany koa, ary amin'ny fomba hilazan'ny mpaka sary tsirairay avy ny tantara any am-pon'ny mpaka sary.”
Nitarika ny tafatafa ny namany Daniela. Te-hanova ny endrika maherisetra sy ratsy izay ananan'i Honduras amin'izao tontolo izao i Claudia sy i Daniela, ary tian-dry zareo hiova ihany koa ny fijerin'ny Hondiorana ny fireneny.
Amin'ny alalan'ny saripika sy ny tafatafan'i Claudia sy Daniela no hanantenan-dry zareo fa i Honduras dia firenena “feno olona miasa mafy, vahoaka manana ny nofinofiny, zaka-kendrena eo amin'ny fiainana, fifaliana sy alahelo tahaka ny fahita amin'ny vazantany efatr'izao tontolo izao.”
“Niangavy azy aho ny hitsiky fa niteny tsotra tsy nisorona izy hoe, ‘Tiako tokoa ny hanao izany, saingy amin'ity asa ity dia mila matotra ianao.’ ary tamin'izany no nampisehoany fa mamitaka ny fijery tsotra amin'izao.”
Saripikan'i Claudia, nahazoana alalana.
Olombelon'i Guatemala
“Miadana fa mijoro! Eny, lavitra ny lalana fa hataoko izany.”
Saripikan'i Elmer Alvarez, nahazoana alalana.
Efa naka sarin'olona nanerana an'i Guatemala i Elmer Alvarez nialoha ny nanombohana ny pejy Facebook Olombelon'i Guatemala tamin'ny Septambra 2013. Wendy Del Aguila, izay manoratra ny mombamomba ny sary amin'izao fotoana,no niteny tamin'i Elmer momba ny Olombelon'i New York ary mahatsiaro mavitribitrika hanatontosa pejy mitovitovy amin'izany momba an'i Guatemala.
Nitady “hanapika sary tampoka ireo olona mahafatra-po ahitana ny tsikiny,ny fitiavany, ny mahavariana azy, ny asany mafy, ny fahamenarany,ny fahatsaram-pony ary indrindra indrindra ny maha isa fa tsy roa azy ireo tsirairay avy!” i Elmer sy i Wendy.
La Teacher-“Avelao ny tsikinao hanova izao tontolo izao”
Saripikan'i Elmer Alvarez, nahazoana alalana
“Olombelon'i …” Hafa koa
“Efa roa taona izao i Don Pedro isa-maraina no nanokatra ny taqueria-ny tao amin'ity tanàna kely ity. Efa manana ny mpanjifa zatra aminy izy ary manome tacos maimaipoana amin'ny mpamily manajanona ny ity minibus entin-dry zareo eo akaikin'ny tsenany. “
Saripikan'i Meksika, nahazoana alalana
Ny sary eto ambony dia avy amin'i Olombelon'i Meksika, pejy iray nisokatra tamin'ny Marsa 2010. Mbola avy ao Meksika ihany, Olombelon'i Mexico City mitady hananganana “fanisana ny sarin'i Mexico City. Sarintavan'olona iray isaky ny arabe ao anatin'ny fotoana iray.”
Olombelon'i Costa Rica, pejy iray niforona tamin'ny Jolay 2013, nahazo “tia” mihoatra ny 1.700.
Any Brezila, ny pejy Facebook-n'ny Olombelon'i Rio de Janeiro no iray amin'ny mavitrika indrindra ao amin'ny faritra, ary nahazo “tia” mihoatra ny 9.000.
Ny pejy Facebook sasany – tahaka ny Olombelon'i Nicaragua, Olombelon'i Panama, ary ny Olombelon'i Santiago, Chile- dia miangavy ny mpiserasera handray anjara hanome sary amin'ny tetikasa. Ny hafa tahaka ny Olombelon'i Quito, Olombelon'i Lima, Olombelon'i Peru, ary ny Olombelon'i Asunción- indray dia vao latsaky ny iray volana izay no nitsangana.
