- Global Voices teny Malagasy - https://mg.globalvoices.org -

Voaheloka Namono An-kerisetra Tovovavy Ilay Ramatoa Mitondra Vohoka Sy Ny Vadiny Tao Shina

Sokajy: Azia Atsinanana, Shina, Ady & Fifandirana, Lalàna, Mediam-bahoaka

Vehivavy bevohoka iray no voalaza fa naka an-keriny tovovavy 17 taona mba hanao firaisana ara-nofo amin'ny vadiny, nanampy ny vadiny tamin'ny famonona ilay tovovavy izy mba hanafenana ny asa ratsy vitan'izy ireo, hoy ny filazan'ny polisy [1][zh] avy ao avaratra-atsinanan'i Heilongjiang, ao Shina tamin'ny 25 Jolay 2013.

Ny folakandron'ny 24 Jolay, nandalo tao amin'ny kirihitr'ala ao Jiamusi an-dalana hamonjy ny tranon'ny mpiara-mianatra aminy i Hu Yixuan, mpianatra mpanampy mpitsabo 17 taona, raha nahatsikaritra vehivavy bevohoka nitorovoka tamin'ny tany. Niangavy tamin'i Hu ity vehivavy bevohoka sy hita ho mitaintaina mafy ity mba hanampy azy hiakatra ambony rihana any an-tranony.

“Manampy renim-pianakaviana hody any an-tranony. Vao tonga.” Hafatra nalefany tamin'ny namany iray ao amin'ny Wechat tamin'ny 3:18 hariva, toa nanjary hafatra fara-veloma ny hafatra voapetraka tao amin'ilay servisy mpikarakara somaiso sy hafatra am-bava am-pinday.

Araka ny filazan'ny Dbw.cn [2] [zh], vavahadim-baovao  lehibe indrindra ao Heilongjiang, heverina ho nentin-dRamatoa Tan niditra tao an-trano ilay tovovavy ary nomeny tavoahanginà yaourt efa nasiany fampatoriana. Nilaza ny loharanom-baovaon'ilay tranonkala fa saiky hanolana azy ireto mpivady avy eo, saingy tsy nahavita izany satria tao anatin'ny fadim-bolana ilay tovovavy. Araka ny filazan'ny habaka ihany koa, na dia saiky hampandeha ilay tovovavy aza ilay ramatoa dia tsy nanaiky rangahy fa nanakenda azy tamin'ny ondana.

Nisy nahita anefa ny fandehan-javatra sy ny nitondran'izy mivady ny fatin'i Hu tao anaty fiara. Naharay antso avy amin'ny fianakavian'ilay tovovavy ny polisy ny 26 Jolay ka voasambotra izy mivady roa andro taty aoriana. Naterina teny amin'ny hopitaly ilay vehivavy mitondra vohoka 8 volana.

A pic of the victim Hu Yixuan, from Sina Weibo.

Sarin'ilay niharam-boina Hu Yixuan, Tao amin'ny Sina Weibo.

Nampiady hevitra fatratra ny antony nanetsika ilay ramatoa hanao izao fihetsika izao. Nilaza tao amin'ny fampahalalam-baovaom-panjakana Global Times [3] ny polisy ao an-toerana fa niaiky ireo voarohirohy fa naka an-keriny ilay tovovavy mba hanonerana (ho solon'ny) ny ahiahin-drangahy ho nofitahin'ny vadiny.

Na dia izany aza, mifanohitra amin'izany ny loharanom-baovao azon'ny Dbw. “Tsy marina izany. Bevohoka izy ka tsy afaka manao firaisana izy ireo, dia nitady tovovavy hoan'ny vadiny izy (mba hiray aminy). Efa ela izy no nanana izany hevitra izany.”

Tsy niteraka fahatezerana teo amin'ireo mpiserasera Shinoa tao amin'ny bilaogy madinika malaza Sina Weibo ihany ny herisetran'ireto mpivady ireto fa niteraka adihevitra teo amin'izy ireo ihany koa fiarovan-tena nataon'izy mivady.

Tezitra mafy i Wang Zhuo [4] [zh], mpikambana ao amin'ny Komity maharitry ny Komity fakan-Kevitra momba ny politikam-bahoaka [5]:

必须严惩这对狗男女

Tokony hosaziana mafy ireto mpivady vetaveta ireto.

Mpisolovava monina ao Shanghai, Wang Yinyi [6] [zh] nihevitra mahamenatra ny tsy nampiharana tamin'ilay vehivavy ny sazy fanamelohana ho faty:

老婆怀孕,帮老公找个处女发泄性欲,还是一个好心帮助他们的少女,之后再先奸淫后杀,我无法想象这还是人类社会做出来的事情,萨特曾说,他人即地狱,在这里每个人都可能成为你的地狱,通往地狱的道路有时候竟然是那人性中最真善美的怜悯之心。真可惜了那个女犯罪嫌疑人是个孕妇,不能适用死刑。

Nahita olona hataon'ny vadiny kilalao ara-nofon'ny vadiny ilay vehivavy bevohoka dia tovovavy saika hamonjy azy, alohan'ny hamonoana an-kerisetra. Tsy takatry ny saiko hoe olombelona no mahavita izany. Niteny i Sartre hoen “ireo hafa no helo (afobe)”, saingy eto mety ho helo avokoa na iza na iza, ary mety ny hatsaram-panahy mihitsy no hitarika anao mankany amin'izany. Mahamentra fa fa mitondra vohoka ilay ramatoa ka tsy afaka helohina ho faty.

Filoha Tale Jeneralin'orinasa momba ny aterineto Ma Yan [7] [zh] namaly izany tamin'ny hevitra hafa mihitsy:

开错药。应该开放色情业

Diso famaha olana. Ny fivarotan-tena no avelao ho ara-dalàna.

Diso fanantenana tanteraka amin'ny maha-olombelona, na ny tsy fisian'izany i Nie Weiping [8] [zh]:

一个孕妇都能做出这种事来,令人发指。冷酷无情、人性无存的法盲,犹如禽兽,防不胜防,实在可怕。

Tsy azo saintsainina fa renim-pianakaviana no nahavita izao. Lozabe, tsy misy fo, tsy nianatra lalàna sady tsy misy izay mahaolombelona. Tsy afa-miaro tena manoloana azy ireny ianao.

Mpahay tantara ‘Shanshui You Yan’ [9] [zh] naneho ny ahiahiny:

这种事的结果,就是街上孕妇求助不会有人敢帮忙了……

Ny voka-dratsin'ity voina ity dia tsy hisy mpamonjy intsony ireo vehivavy mitondra vohoka eny an-dalambe…

Mpanoratra Bai Xiaofan [10] [zh] nanoso-kevitra mba haka lesona amin'ilay tantara mitohy malaza Amerikana  “Criminal Minds [11]” amin'ny fahitalavitra ny tovovavy hiarova-tena:

这就是为毛我总推荐妹子们看CM。看完以后自身防御体系UP好几个等级。比如遇到迷路的小孩,抱着垂危宠物求救的主人,看似不舒服的孕妇,正确的做法都是——报警+联络家人+在足够热闹的地方等待+求医。不要送他们到指定的地点,切记切记。

Izany indrindra no mahatonga ahy hilaza amin'ireo tovovavy mba hijery ny Criminal Minds. Mampitatra ny fahatsiarovantena hahay miaro tena amin'ny lafiny maro. Ohatra, raha mahita zaza very ianao, na olona miaraka amin'ny biby fiompiny maratra, na vehivavy bevohoka marary, ny fihetsika tsara tokony atao dia ny miantso polisy, miantso ny fianakaviany, miandry eny amin'ny toerana somary be olona ary mandefa azy eny amin'ny hopitaly – fa tsy mandeha amin'ny toerana iangaviany hitondranao azy. Ataovy an-tsaina tsara izany.