- Global Voices teny Malagasy - https://mg.globalvoices.org -

Ejipta: Tsy Mila Fandevenana Miaramila Ho An'i Omar Sulieman.

· Mpanoratra Amira Al Hussaini Nandika avylavitra

Sokajy: Afrika Avaratra sy Afovoany Atsinanana, Ejipta, Fahasalamàna, Mediam-bahoaka, Politika, Vaovao Mafana

Maty i Omar Suleiman, praiminisitra lefitr'i Hosni Mubarak sady lehibe taloha tao amin'ny sampam-pitsikilovana tao Ejipta. Ny vaovao momba ny fahafatesany [1]  dia nitondra onjam-panehoan-kevitra maro teny anivon'ny tambajotra sosialin'ny fampahalalam-baovaon'olon-tsotra.

Rangahy io, izay isan'ny nihazakazaka tamin'ny fifidianana ho filoham-pirenena tao Ejipta dia tsy afa-nirotsaka noho ny tsy nahavitany nanangona ny fetran-tsonia notakiana ho amin'ny firotsahany, dia nodimandry tany Cleveland, Etazonia, nandritra ny fanaovany fanaraha-maso ara-pahasalamana.

Ao amin'ny Twitter, ny mponin'ny aterineto avy amin'ny tontlo Arabo dia tsy nahita loatra zava-toa mba hitomaniana ny fahalasanany.

Samar Dahmash Jarrah mibitsika hoe [ar]:

لو يدري الناس كم ساهم عمر سليمان في بيع مصر لاسرائيل وقتل وتجويع اهل غزة وتشويه صورة الاسلام والمسلمين في الغرب
@ArabVoicesSpeak [2]: Raha mba fantatry ny olona mantsy hoe hatraiza no mahatafiditra an'i Omar Suleiman tamin'ny fivarotana an'i Ejipta tamin'i Israely sy ny famonoana ary tsy fanomezan-kanina ireo vahoaka ao Gaza sy ny fanimbàna ny endriky ny Silamo sy ny miozolmana eo imason'ny Tandrefana.

Deena Adel manamarika hoe:

@deena_adel [3]: Tomponandraikitra tamin'ny tranganà habibiana & fanitsakitsahana zon'olombelona  tsy tambo ho isaina i Omar Suleiman. Tsy mampihetsi-po ahy akory ny fahafatesany, nefatsy hifaly amin'izany koa aho.

Sara Salem dia mampitaha an'i Suleiman amin'ny olon-tsotra Ejiptian rehetra :

@SaraMSalem [4]: Maty i Omar Suleiman rehefa nahazo ny fizahana ara-pitsaboana tany Cleveland. Ny ankamaroan'ny Ejiptiana tsy afaka akory na dia ny hamonjy any amin'ireo toeram-pitsaboana tsizarizary natao ho an'ny daholobe aza.

Mandritra izany, Medhat Rali manontany tena hoe [ar]:

تخيل لو كان عمر سليمان كسب فى انتخابات الرئاسه و بقى رئيس كان هايموت بعدها بشهر

‎‫

@medhatrali [5]: Alaivo sary an-tsaina raha i Omar Sulieman no nandresy tamin'ny fifidianana ho filoha ka lasa filoha teo, ary maty iray volana taty aoriana.

Wael Abbas, Ejiptiana bilaogera ela nihetezana sia nanomboka ny tenifototra [6] #لا_لجنازة_عسكرية_لعمر_سليمان‬‏ tao amin'ny Twitter amin'ny teny Arabo izay midika hoe  Tsy Mila Fandevenana Miaramila Ho An'i Omar Sulieman.

Feedo Ahmed mamaly hoe :

#لا_لجنازة_عسكرية_لعمر_سليمان‬‏ لو عملوها نجيب رقصات من شارع الهرم وشوية طبل علي كام واحد من فرقة حسب الله ونزيط بقي في الجنازة


@feedoahmed: Raha manao izany ry zareo ka manao fandevenana miaramila, isika kosa hitondra mpampandihy kibo sy mpively amponga ka hanao izay tsy hampanjary ny fandevenan-dry zareo

Ramy Bakazaboka manampy hoe :

ملهاش لازمة سيبوهم يعملوها هيحضر السفاحين صحابه و يتحسرو على قائد الفترة الانتقامية ‎‫#لا_لجنازة_عسكرية_لعمر_سليمان‬‏

@ramy_bakazaboka [7]: Tsy misy dikany ny amin'io. Avelao ry zareo hanao ny fandevenany izay hoatrehan'ireo mpanimbin-kena namany ihany hitomany ny fahalasanan'ny lehiben'ny vanim-potoanan'ny famaliana faty.

Ary Ahmed Sabry mamintina hoe :

انا رايي يدفن كتيمي من غير جنازه اساسا ويا ريت ف مكان مجهول
@A_M_Sabry [8]: Ny fomba fijeriko dia hoe halevina mangingiana izy tsy asiana mpanotrona ary raha azo atao aza dia any aminà toerana hotazonina ho tsiambaratelo ihany koa.