Filipina: Naely An-tserasera Fa Atao Hazalambo Ilay ‘Mpanitsakitsaka ny Zon'olombelona’

Nalefa an-tserasera ny ezaka atao amin'ny fisamborana ilay jeneraly kintana iray Jovito Palparan taorian'ny fivoahan'ny didy fisamborana ity olona voarohirohy ho mpanitsakitsaka ny zon'olombelona ao Filipina ity. Olona niharan'ny tsy fanajana ny zony, vavolombelona, fianakaviana ary ireo mpanohana voatonona farany rehetra ireo no nitaky ny hanaovana hazalambo an'i Palparan satria fantatra fa mbola tsy tafatsoaka ny firenena izy ary manam-pahefana no manafina azy ankehitriny.

Malaza ho “mpampandriaka ra” [dika ara-keviny] voampanga ho naka ankeriny sy nanagadra ireo mpianatra ao amin'ny Oniversite ao Filipina Sherlyn Cadapan sy Karen Empeno tsy araka ny lalàna i Palparan.

Malaza ratsy amin'ny famonoana olona tsy araka ny lalàna, ny fakana an-keriny sy ny fanitsakitsahana ny zon'olombelona i Palparan isaky ny faritra niasany nandritra ny fitondran'ny Filoha teo aloha Gloria Macapagal-Arroyo.

Vondrona mpiaro ny zon'olombelona no namoaka fanadihadiana fa farafaharatsiny, 1.206 no novonoina ho faty, 206 nalaina an-keriny, ary 2,059 nosamborina sy nogadraina tsy araka ny lalàna nandritra ny fitondrana teo aloha.

Nifanentana mba hanampy ny renin'ireo mpitolona anankiroa tsy hita popoka ny mpiserasera tamin'ny alalan'ny famoahana afisy “Wanted: Palparan” ary naparitak'ireo vondrona mpiaro ny zon'olombelona Karapatan, Desaparecidos ary Hustisya tao amin'ny bilaogy, tao amin'ny pejy Facebook, ary tao amin'ny valantserasera hafa ihany koa. Ity manaraka ity koa lahatsary noraiketin'ny vondrona tamin'ny aterineto:

Nilaza ny renin'i Cadapan sy Empeno fa fanombohana vaovao ny baiko fisamborana an'i Palparan noho ny fitakiana ny fanagadrana io tompon'andraikitra mpanitsakitsaka ny zon'olombelona  io  ary manampy amin'ny fanafoanana ny tsy fisaziana ao amin'ny firenena koa izany , izay mbola mitohy hatrany amin'izao fitondrana vaovao tarihin'i Noynoy Aquino izao.

Notontosain'ny vaomiera tsy mifaditrovana mpamono olona tsy araka ny lalàna, maka ankeriny, mampijaly olona sy manao karazana fanitsakitsahana ny zon'olombelona mihevitra ny ho tsimatimanota nandritra ny fitondran'i Macapagal-Arroyo. Mbola mitohy izany fanitsakitsahana ny zon'olombelona izany ary tsy misy fanasaziana hatramin'izao fitondran'i Aquino izao, izay atao ankilabao hatrany rehefa misy ny fampiakarana ny raharaha eny amin'ny fitsarana ataon'ireo olona niharan'ny fanitsakitsahana ny zony ary mbola miaritra ihany koa ny fepetra manohitra ny fikomiana izay mampihorohoro sy manitsakitsaka tsy misy antony ny zon'olombelona.

 

Mpanao gazety ao Mindanao antsoina hoe Karlos Manlupig mahatsiaro ny fihaonany manokana tamin'i Palparan sy ny tahotra tao amin'ity farany nandritra ny fiandrasana ny valiny faran'ny fifidianana tamin'ny volana Mey 2010 tao  Davao, ao Atsimon'i Mindanao.

Mpianatra mpitolona, toy ny vazivazy, no mampitaha an'i Palparan tahaka an'i Tito Palpy ary mampiasa izany matetika mba hampitahorana ireo kasamas sasany[mpitolona namana] raha sendra tafody alina izy ireo, “Hala ka, naa baya si Tito Palpy diha sa gawas sa gate. Ginahulat ka [Tandremo, fa eto anoloan'ny vavahady eto i Tito Palpy. Miandry anao].”

Oniversiten'ny mpianatra Filipina Regent Krissy Conti nanamarika fa hitondra filaminana ho an'ny mpianatra marobe mirotsaka amin'ny asa sosialy  ny fisamborana an'i Palparan

Hanome anay filaminan-tsaina kely ihany ny fisamborana sy fanagadrana an'i Palparan sy al any am-ponja ka hotohizanay foana ny asa sosialy, hirotsaka any anaty tanàna izahay, ary hanampy ny vahoaka amin'ny toerana rehetra ahitanay azy ireo- tahak'izany ihany ko-no ataon'i Karen sy Sherlyn. Tsy manam-bola hozaraina izahay, fa ankasitrahanay tanteraka ireo izay afaka misambotra ireo lehilahy mampihorohoro ny firenena.

Tetsy andaniny, nampahatsiahy tao amin'ny bolongany i Ellen Torsedillas ny amin'ny fomba nanomezan'ny filoha teo aloha Arroyo fankasitrahana an'i Palparan na dia teo aza ireo resabe mikasika ity olona ity.

Tamin'ny kabary faha-enina milaza ny toe-draharaha-pirenena tamin'ny  24 Jolay 2006, Gloria Arroyo, manoloana ny hiakan'ireo ray aman-drenin'ny mpianatra ao amin'ny Oniversité ao Filipina Sherlyn Cadapan sy Karen Empeño sy ny fianakavian'i  Manuel Merino, ilay mpamboly, no nideran'i Gloria Arroyo ny iray tamin'ireo jeneraly tena atahorana sy halan'ny olona indrindra – ny Major Jeneraly Jovito Palparan, Lehiben'ny tafika faha- 7 ao amin'ny Toby Luzon, izay toerana nitrangana famonoan'olona tsy araka ny lalàna marobe.

Atombohy ny resaka

Mpanoratra, azafady Hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.