Libya: #OccupyTripoli Manohitra ny Fitondrana Fitaovam-piadianans
Nanao fihetsiketsehana tao an-drenivohitra Tripoli ny Libyana androany, ho fanoherana ny fampiasana fitaovam-piadiana, tao amin'ilay kianja malaza antsoina hoe kianjan'ny Martiora, kianja Maitso teo aloha, no nanaovana ny hetsika. Mpisera Twitter maro no tonga tao mba hampita mivantana ny hetsika nomena anarana hoe #BodoyTripoli.
- Soram-baventy nandritra ny hetsika tao amin'ny pejy Facebook mivaky hoe: Miarahaba anao tonga soa ny Tripoli – raha tsy mivatsy fitaovam-piadiana ianao
Tahaka ireo “hetsika” niseho manerana ny tontolo Arabo nandritra ity taona ity, ny hetsika androany dia hitohy hatramin'ny 11:30 alina ora ao Tripoli, nokarakaraina ho toy ny hetsika amin'ny Facebook izany. Manambara ny pejy Facebook fa ny hetsika izay natao teo ambanin'ny fiahian'ny Filan-kevitra Monisipaly ao Tripoli, dia ny mba hanehoana ny hatezeram-bahoaka noho ny fisian'ireo fitaovam-piadiana sy andian-dehilahy mitondra fitaovam-piadiana avy any ivelan'i Tripoli.
Tao amin'ny Twitter, Adam nizara ity sary nandritra ny hetsika ity:
@4Adam: Fihetsiketsehana ao amin'ny kianjan'ny Martiora ao #Tripoli ho fanoherana ny fitondrana fitaovam-piadiana. 7 desambra 2011 #Libya
Mpanao fihetsiketsehana mitondra soram-baventy mivaky hoe Revolisionera, Misaotra nahafoy ny fitaova-mpiadiana ka nivatsy boky. Sary: @4Adam ao amin'ny Twitter
Assia Bashir Amry, Libyana monina any Etazonia, nivazivazy hoe:
@Libyan4life: Ho manan-tantara ny #OccupyTripoli. MBOLA tsy nisy vahoaka marobe nanao fihetsiketsehana mba haneho ny heviny toy izao nandritra ny fitondran'i #Gaddafi. #Libya #Feb17
Ismael Zmirli nanampy hoe:
@ChaingeInLibya: Tsy mbola nandeha tany amin'ny kianjan'ny Martiora izany mihitsy ny reniko, ankehitriny anefa niantso ahy avy ao amin'ny hetsika #OccupyTripoli izy- fotoanan'ny fampihavanana izao, tsy fampiasana fitaovam-piadiana & tafika ao an-toerana
Naneho ny fahagagany noho ny fahalebiazan'ny hetsika ny Tripolitaniana :
@Tripolitanian: Tsy araka ny noeritreretiko ny fahalebiazan'ny fihetsiketsehana #OccupyTripoli; http://pic.twitter.com/vD1IRIkb #Libya
Vahoaka marobe manao fihetsiketseham-panoherana ny fitondrana fitaovam-piadiana. Sary: Aziz Belhaj ao amin'ny Twitter
Mpisera Twitter Libyana maro ihany koa no nahatsikaritra ity afisy manaraka ity izay mahatsikaiky.
Afisy kely mahatsikaiky hita tao amin'ny hetsika androany izay mamporisika ny revolisionera hamela ny fitaovam-piadiany ary hanohy ny fiainany andavanandro. Sary: @Alaref tao amin'ny Twitter
Alaref Hassan nanoratra hoe:
Araka ny nambaran'ny @Libyan4Life, midika toy izao ny tao amin'ilay afisy:
Malahelo anao ny reninao ary maniry ny rainao mba HODY AN-TRANO amin'izay ianao! lol
Antso ho an'ny lehilahy mba hamela ny fitaovam-piadiana izany ary hanohy ny fiainany andavan'andro.
