Akatòny

Fitia Tsy Mba Hetra Hampijoro Tsara Hatrany Ny Global Voices

Miasa mafy isan'andro ireo mpirotsaka an-tsitrapo manerantany ato amin'ny fikambananay hitondra ho anao ireo tantara tsy voatatitra manerana izao tontolo izao -- Saingy tsy afa-manao izany samirery tsy misy ny fanampianao izahay. Tohano amin'ny alalan'ny fanomezana (fitia tsy mba hetra) hoan'ny Global Voices ireo tonia, mpahay teknolojia, mpanentana ara-piarovana ato aminay!

Manomeza anio

Hijery ny Tenim-Pirenena rehetra? Mandika ny tantaran'ny Global Voices izahay mba ho hitan'ny rehetra ny fitantaran'olo-tsotra manerantany.

Ireo mpitsoam-ponenana Palestiniana very any Lybie

Anisan'ireo lahatsoratra momba ny Fihetsehana tany Lybie 2011 ity lahatsoratra ity.

Ireo vahoaka any Libiae, izay mirotsaka an-tsehatra amin'ny ady ho an'ny  demokrasia ary manohitra an'i Muammar Gaddafi sy ny miaramilany, no miaritra ady aman'aina efa ho herinandro maromaro izao. Vahoaka marobe no efa nandositra ny fireneny ka lasa any Tonizia na Ejipta, na any amin'ireo toby natokana hanampiana vonjimaika ireo mpitsoam-ponenana.

Palestinian students set fire to a poster of Libyan leader Gaddafi in Gaza City. Image by Mohammed Othman, copyright Demotix (22/02/11).

Mpianatra Palestiniana nandoro ny sarin i Gaddafi ao Gaza. Sary nalefan i Mohammed Othman, copyright Demotix (22/02/11).

Maherin'ny 10% amin'ny vahoaka Libiana no mpifindra monina. Amin'ireo indray dia heverina ho 70 000 ny isan'ny Palestiniana mipetraka any Lybie.

Tsy afaka miverina any Palestina ny ankamaroan'izy ireo. Ny antontan-taratasy momba azy – izany hoe ny zony honina any Palestina – no noesorin’ Isiraely taminy noho ny politikany amin'ny famindran-toerana mangina. Teo anelanelan'ny desambra 1995 sy marsta 1999 dia nesorin'ny Israeliana ny zo ahazoana mipetraka any Palestina ho an'ireo olona nifindra toerana any ivelan'ny faritra farany ao Jerosalema, kanefa tsy nampahafantariny an'ireo Palestiniana monina any ivelan'ny tanàna sy any ivelan'ny fireneny izany politikany izany.

Mpitsoam-ponenana eo amin'ny sisintany

Nandritra ny herinandro lasa teo, olona tsy mizaka ny zom-pirenena libiana maherin'ny 10 000 no nandositra nankany amin'ny sisintany manasaraka amin'i Tonizia, izay toerana handraisan'ny masoivohony azy avy.

Niezaka naka ny terantaniny any Lybie koa ny fanjakana palestiniana. Nanaiky ny  hampidirana olona 300 mandra-pahatonga any amin'ny faritra feheziny i Israely amin'ny “maha olombelona mila fanampiana azy ireo”.

Lasa ny andiany voalohany amin'ireo mpitsoam-ponenana palestiniana ireo araka ny vaovao azo izay milaza fa mpianatra palestiniana 43 no tazonin'ny mpikarama an'adin'i Gaddafi ao Misurata rehefa tsy nanaiky nanaraka ny tafiky ny mpanaradia ny fanjakana izy ireo. Tamin'ny faran'ny volana febroary 2011 dia nitotaly 104 ireo mpianatra palestiniana niala tany Lybia.

Ny 01 marsta 2011, nampandre ny terantaniny any Lybia ny fanjakana palestiniana fa afaka mandalo vonjy maika ao Ejipta izy ireo, rehefa natao ny fifanarahana tamin'ny fanjakana Ejipsiana. Nolazainy koa ny fahasarotana amin'ny fangalana ireo Palestiniana raha ampitahaina amin'ny an'ny teratany avy amin'ny firenena hafa noho ny tsy fahampian'ny fitaovana eo am-pelantanan'ny fanjakana Palestiniana.

Mandritra izany rehetra izany, na dia efa tonga ao amin'ny sisintany ao Salloum hiditra an'i Ejipta aza ny andiany voalohany amin'ireo Palestiniana dia nolavina ny fidiran'izy ireo. Toy izao ny fanamarihana avy ao amin'ny twitter:

@Abou_3ali [Yemen] Avy amin'ny namana ao Salloum: nolavin'i Ejipta ny fandalovan'ny Palestiniana ary nentina nankany amin'ny tanàna haolo ny 70 amin'izy ireo, misy zavatra tsy miova mihitsy.

@El_Deeb [Egypt]: Ny olona avy amin'ny firenena hafa rehetra afaka niditra ao Ejipta daholo afa-tsy ny Palestiniana ihany! Tena mampalahelo! 70 no isan'ny Palestiniana nentin'ny fiarabe izay nolazaina fa hanatitra azy ireo any amin'ny sisin-tany any Rafah, avy eo alefa any Gaza. Niverina nankany Libia ireto fiarabe!

@altahawi [Egypt] Satria tsy manana fahazoan-dalana hipetraka ao #Egypt izy ireo, Palestiniana 42 no nolavina tao Salloum ary naverina nankany Libia tamin'ny herinandro lasa teo!

Tsy fahazoana miditra an'i Ejipta

Palestiniana 1 500 eo ho eo no nitady handalo an'i Ejipta hatramin'ny alatsinainy 7 marsta 2011, kanefa nahazo baiko mazava ny miaramila Ejipsiana fa tsy mahazo miditra ireo mpitsoa-ponenana Palestiniana [ar]. Palestiniana marobe no efa tonga teo amin'ny sisin-tany ary voatery niverina nody any an-tranony, any amin'ny tanànan'i Benghazi sy Tobrouk.

Tamin'ny 08 martsa 2011, Palestiniana 15 no tonga teo amin'ny sisin-tany ao Salloum, nanatena ny ho tafita, ary Palestiniana aman-jatony maro tsy mety miverina any an-tranony fa mifidy ny hiandry eo, no ampiantranoin'ny olona any amin'ireo tanàna manakaiky ny sisin-tany.

Voalaza fa izay Palestiniana tsy manana taratasy fahazoana mipetraka any Ejipta dia tsy mahazo mandalo ny sisintany mihitsy, kanefa na dia ireo mpiasa aziatika tsy manana taratasy [ar] aza dia mahazo miditra. Maneho ny heviny manoloana ny zava-misy ireo Palestiniana avy any Gaza ao amin'ny Facebook:

Ibtihal Any Misurita ny dadatoako, tsy manana kara-panondro izy, tsy afaka miditra any Gaza ny Palestiniana tsy manana taratasy, angamba manaraka ny fandaminana efa nisy hatramin'ny ela ny fanjakana Ejiptiana. Noho ny zava-misy ao anatin'ny fireneny koa, dia tsy maintsy eritreretiny izao fa mampatahotra ny Palestiniana. Tsy mivaky loha amin'izay maika izany izy.

Ibrahim Tsy manana taratasy ireo Palestiniana ireo, ny mpitsoa-ponenana hafa anefa manana ny fireneny, ny tanindrazany izay afaka mikarakara azy ka mampody azy. ny Palestiniana kosa tsy mba manana. raha mandalo an'i Ejipta izydia tsy mahita toerana aleha akory, na any Gaza izany, na any Cisjordanie, ary tsy te hivesatra azy ireo i Ejipta. Tsy ny Palestiniana any atsinanan'i Lybie loatra anefa no mampanahy fa ry zareo any andrefana. tsy fantantsika akory hoe tonga tany amin'ny sisintany any Tonizia ve izy ireo.

Tsy nisy ny antontan'isa mazava milaza ny isan'ny Palestiniana tonga tany amin'ny sisintany any Tonizia.  Fiarabe mitondra fanampiana ho an'ny Palestiniana no hoe nalefan'ny masoivohony tany Tunis hanomezan-tanana azy ireo ao amin'ny sisintany manasaraka an'i Libia sy Tonizia.

Any an-toerana izay azo anaovana izany dia mifandamina ny olon-tsotra hanampy ny Palestiniana voatery mijanona any Libia:

@libyansrevolt: Misy Palestiniana iray mipetraka ao amin'ny toeram-piompianay any Tripoli. tsy nampandoavina na inona na inona izy.

Fandraisana andraikitra maika

Ny bilaogy Uprooted Palestinians no namoaka antso hanampiana ny mpitsoa-ponenana Palestiniana izay nonina sy niaina tany Liban taloha ka nandositra ny ady an-trano tao amin'ity firenena ity dia lasa nankany Libia. Mangataka fandraisana andraikitra iarahan'i Liban sy Palestine ankehitriny hanampiana azy ireo hiala any Lybie

Very izahay satria tsy misy miraharaha ny momba anay.

Ho an'ny Palestiniana efa nipetraka tany Libia nandritra ny 35 taona, avy any Liban nandositra ny ady an-trano, ka niara-nonina tamin'ny rahalahinay any Libia, nanambady sy niasa tany Libia. Farafaharatsiny, taorian'ny fanoherana tamin'ny 17 febroary sy ny lafiny fiarovana izay hita fa miharatsy, niezaka niala ny firenena izahay tamin'ny fomba rehetra, kanefa tsy tafita, noho ny antontan-taratasy tsy ampy. Kepoka izahay ankehitriny, ary voatery mivarotra fananana vao mihinan-kanina. Tsy manana asa sady tsy manana trano, tsy fantatray izay hataonay sy izay halehanay .

Miharatsy hatrany ny toe-draharaha. Ny vaovao farany no nilaza fa manao famoretana amin'ireo mpiasa mpifindra monina miisa 30 000 izay niezaka nandositra nankany Tonizia ny miaramila mpanaradia an'i Kadhafi.

Maika ankehitriny ny firesahana ny hanjo ireo mpitsoam-ponenana lasa gadra ao amin'ny firenena tafahitsoka anatin'ny ady.

Atombohy ny resaka

Mpanoratra, azafady hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.