Ranomaso, hirifiry, firaviraviana tànana sy fitsérana no nisoritra teny amin'ny endrik'ireo tanora Ejyptiana sy mpitoraka blaogy nandritra ny fitsidihana nataon'izy ireo tao amin'ny tobim-pitsaboan'ny Croissant Rouge ho fanehoana fanohanana sy fitondrana teny fampiononana ho an'ireo tra-pahavoazana noho ity vonomoka israeliana ity. Tsy nijerena firehana potilika, na finoana ara-pivavahana fa dia nirohotra daholo izahay nankany amin'ny Nasser Institute, toerana nihaonanay tamin'ireo tanora maro be tokoa avy amin'ny “Zanakalahin'i Ejypta”, “ny Gazetiboky Ba7l2a”, “Ny tanora Facebook”, ary ny “Fikambanana Ejyptiana ho an'ny Kolontsaina sy ny Fifanakalozan-kevitra”.

Nandray tsara anay ireo trà-pahavoazana ireo ary tena faly tokoa nahita anay. Na dia maro tamin'izy ireo aza no nandà ny fanampiana ara-bola, vantany vao nifanojo ny fijerinay dia toran-tomany izy ireo. Nolazain'izy ireo anay ny tantara mampihoron-koditra niainany sy ny fomba nahatapahan'ny fifandraisan'izy ireo tamin'ny fianakaviany, ny reniny, ny zanany, ny vadiny, ary na i Gaza aza dia tsy afaka koa mifandray amin'ny any ivelany. Tsy misy indrafo fa amin'ny fotoana rehetra ny fanafihana, midoboka mamono sy mandratra an-jambany ny rokety [roquettes] sy ny baomba.

Nandray feo olona roa tamin'ireo naratra aho, izay nanaiky ny hanadihadiako azy. Vehivavy iray no tsy nahafehy intsony ny tenany raha nitantara ny namoizany ireo zanany. Lehilahy iray indray izay raha jerena ivelany dia toa tsy maninona no niondrika nivavaka nandritry ny fotoana naharitra tao amina efitrano iray nifanila teo.  – fotoana fohy taorian'izay no nahalalànay fa namoy ny zanany lahy teo amin'ity tobim-pitsaboana ity izy ny omalin'io. Rehefa nitsahatra izy, niara-namindra teny izahay ary tsy nisoka-bava mihitsy izy; tamin'ny hafanàn'ny fangirifiriana tsy miloaka no nentiny kosa niarahaba sy nandray anay, ny fijeriny very lavitra any. Nigogogogo nitomany daholo izahay. Tsapanay ny ngidin'ny tsy fahafahana manoatra.

Sary nandritra ny fitsidihana

Resadresaka tamin'ireo tra-pahavoazana

Miangavy anareo izahay mba hitsidika ireo trà-pahavoazana ireo any amin'ireto tobim-pitsaboana ireto:

Tobim-pitsaboana Croissant Rouge – Ramsis Square

Nasser Institute – Mazalat

Any Palestina – Heliopolis

Nomarihako koa nandritra ny resadresaka nataoko tamin'ireo trà-pahavoazana fa tsy mànana firehana politika velively ry zareo; tsy mpanohana ny Hamas na ny Fatah na vondrona hafa toy izany. Olon-tsotra daholo ry zareo ary te-hiaina am-pilaminana, hiasa, hanangona, ary hanondrotra ireo taranany. Ho solon'izany anefa dia voadaroka baomba tsy amin'antony ry zareo.