Hatramin'ny faran'ny volana Janoary lasa teo dia rivomahery maherivaika 3 [Fame, Ivan, Jokwe], no nifanesy namely mafy an'i Madagasikara, ny farany amin'izy ireo dia ny rivomahery Jokwe izay niditra an-tanety tany Antsiranana, any amin'ny faritry Diana, any Avaratry Madagasikara, izay nandrava trano mihoatry ny 40 ary namela tsy manan-kialofana miisa 400 mahery tany Nosy Be. Na dia tsy voa be toy izany aza, dia isan'ny voakasika koa ny tanànan'Antsiranana, avy eo i Jokwe dia nizotra niankandrefana namotika trano fonenana maro hafa tany amin'ny morontsirak'i Mozambika.
Ary satria vazivazy masiaka [vazivazy ny hoe joke izay mifanila amin'ny anaran'ilay rivomahery “Jok(w)e”] avy amin'ny zava-boahary izao fidonan'ny tonon-taonan-drivomahery izao, dia manentana ireo manam-pahefana ireo mpiblaogy mba hanatsarany ireo fiomanana ho fisorohana ireo takaitran’ny rivomahery. Ny fanadihadiana ireo izay mety ho antony hanampy trotraka ny voina rehefa tafiditra an-tanety ny rivomahery dia mety hanampy amin'ny fisorohana voina maro tokoa, indrindra raha heverina fa efa miforona sahady any amin'ny 1'200 km Atsinana'i Madagasikara ny rivomahery faha-4 izay nampitondraina ny anarana hoe Kamba.
[sary nindramina tamin'ny planete vivante]
Marie Sophie [teny Frantsay] sy Tomavana [teny Malagasy] dia samy mitanisa ireo fototra nitarika faharavana sy voina be tany Madagasikara :
Araky Tomavana dia :
“ny orana[..], fisondrotry ny haavon’ny ranomasina [..], ny onja ateraky ny rivomahery [..] sy ny rivotra [..]no tena fototr’ireo fahasimbana ”
Toy izao kosa ny fanazavan'i Marie Sophie :
au nombre des victimes corporelles, souvent important (environ 6 000 décès chaque année), s’ajoute un nombre de sans-abri [..]; les habitations y sont généralement très loin d’une conception paracyclonique adaptée [..]. Les conséquences économiques peuvent également être liées à l’interruption des liaisons aériennes et maritimes ou aux dégâts portés aux réseaux divers (eau, téléphone, électricité) […] parmi les atteintes portées à l’environnement, on distingue les effets directs (destruction de forêts par les vents, dégâts des inondations, etc.) et les effets indirects (pollution des côtes par un naufrage, effets dus à un accident industriel ou technologique, etc.)
“miampy ireo isan’ny maty izay matetika maro dia maro tokoa (vinavinaina ho mahatratra 6′000 isan-taona), dia misy ireo tsy manan-kialofana […] matetika ireo trano fonenana dia tsy noheverina hiatrika toetr’andro toy ny rivomahery akory […] Izany fahavoazana ara-toekarena izany dia azo ampirohina koa amin’ny fahatapahan’ny serasera an’habakabaka, an-dranomasina, na ireo serasera famatsiana hafa koa (rano, telefaonina, herin’aratra) […] anisan'ireo fahavoazana mivantana hoan'ny tontolo iainana (fahasimban’ireo reniala noho ny rivotra, tondra-drano, sns …) sy ireo fahavoazana ambadika (fandotoana ny morontsiraka noho ireo sambo rendrika, na koa fahasimban’ny orinasa miteraka fandotoana hoan’izay faritra manodidina, sns …)”
I Jogany kosa dia mitanisa ireo sampan-draharaha famonjena sy fikambanana tsy miankina amin'ny fanjakana maro samihafa izay efa am-pototr'asa fanarenana ary azahoan'ny tsirairay manolotra izay anjara birikiny ho fanampiana ireo tra-boina nohon'ireo rivomahery nifanesy ireo.
[FANAMPIM-PANAZAVANA : amin'ny faran'ny volana Aprily vao azo heverina ho tapitra ny tonon-taonan-drivomahery]
1 hevitra